Dybala a dam fel

Juventus forward Paulo Dybala chuan Covid-19 hneha a dam fel tawh thu a sawi a, Argentina international hi a hrislena dinhmun vawi hnih endik a nih hnuah hri leng lakah hian a fihlim tih puan a ni.

Kum 26 mi Dybala chuan, "Ka hlim hmel hian engkim a sawifiah, tunah chuan Covid-19 lakah ka fihlim ta," tiin instagram lamah a tarlang. Juve player ṭhenkhat chu Turin-ah training turin an kir tawh a, forward Dybala erawh a ṭhiante bulah a la awm ve rih lo thung.

Juve player pathumin hri leng hi an kai a, an zinga pakhat chu Dybala hi a ni. March 21 khana bialnu Oriana Sabatini nen coronavirus an kai tih hmuhchhuah a ni a. April thlatir khan a dam thu puan ni tawh mah se hri lakah a fihlim lo a, tunah erawh a dam fel tawha ngaih a ni.

Dybala hi nipui bazar hmasa khan chhuak tur angin a thawm a ring hle, mahse tun hnaiah club thuneitu lamin chhuahtir an tum lo. Season kal laia inelna hrang hrangah match 34 khelh aṭangin goal 13 a khung.