Mala a lo kir! Zanin dar 7:00-ah Chanmari Vs Police

Mizoram Premier League nomawi chawi tawh coach K. Malsawmkima a lo kir a, Zote Honda MPL9 a nung thar. Zanin dar 7:00 hian RG Stadium-ah Mala hoin Chanmari FC-in Lalbiaksanga Colney kaihhruai Mizoram Police an hmachhawn dawn. MPL-ah Chanmari leh Police inkhel a hmuhnawm ṭhin a, zanina an inkhel tur hi en a châkawm zual.

Team thar
Chanmari FC-in MPL9 match ruk aṭangin point ruk chauh an hmu a, goal nga chauh khungin goal 10 lawih an chhuah. CFC goal bawh a na tawk lo a, an tlarhnung an phui lo bawk. Inelna ṭan hmaa champion rinkai zinga mi Chanmarians-in nomawi inchuhna aiin 'relegation battle' an hnaih zawk.

Chanmari club thuneituten ngaihtuahna thar an seng a, coach tawnhriat nei ṭha Mala an lalut. Aizawl FC coach hlui hi a vannei nghal a, MPL Board-in round 6 khelh hun an sawn avangin inpuahchahna hun a ngah sawt a, vawi thum training a nei hman. Match thum a zawna chak lo Chanmari an phur thar a, coach thar Mala hnuaiah fiahna hautak an hmachhawn nghal dawn.

Mala chuan, "Player tawnhriat nei ṭha zawk Chullova leh Joseph te inhliam vangin an tel thei dawn lo a, player dang an dam ṭha. Ka beisei aiin player-te an ṭha a, first eleven thlan pawh a har. Goalkeeper phei chu Thomas-a (asst coach) thlang turin ka ti. Training vawi thum kan nei a, trial ang deuhin ka kalpui a ni ber. Outfield player-te chu training-naa an khelh dan aṭangin ka thlang," tiin Vanglaini a hrilh.

Chanmari FC-ah hian thil thar a awm nghal dawn tih a chiang a, match ruk khelh tawha bul la ṭan vek captain Malsawmzuala chu bench-ah a awm dawn. Mala chuan, "Sawmtea hi player ṭha a ni a, amaherawhchu training-naah a theihna tak tak ka la hmu lo. Tihian theihtawp a chhuah a, bul a rawn ṭan leh vat ang," tiin a sawi.

Police chu Police
MPL ṭan hma inelna I Day Football-ah Mizoram Police an champion a, coach BS-a leh a hote tan tun season hi champion-na hun ṭha a ni. Police hian player ṭha an kawl hnem a, tawnhriat ang zawnga thlir phei chuan tawnhriat an nei ṭha fal hle.

Chanmari coach Mala chuan, "Police chu inkhelh thiam vanga hna hmu an ni a, an ṭha tih a chiang. Mahse, team ang chuan han huphurhna tur a awm lo. Mizo ṭheuh kan nia, hnam dang an nei bik lo. Hneh kan tum," tiin an khingpui tur chungchang a sawi.

Police hian season ṭha tak an hmang a, tlai lama Aizawl FC leh FC Venghnuai inkhel result a zirin hmahruaitu ni thei dinhmunah an ding. Coach BSa Colney chuan, "Ka naute an dam kim a, game plan pawh chi hnih ka nei. Eng zawk nge ka hman ang tih ka la ngaihtuah mek," tiin Vanglaini a hrilh.

Police tlarhmaa hlauhawm ber chu Malsawmfela a ni a, Aizawl FC an hneh ṭumin Sawmfela hi bench aṭanga rawn lutin chakna goal a khung. Khawzawlah pawh Sawmfela tho a langsar a, inkhel bul ṭanin second half-ah chakna goal a khung leh bawk. Aizawl FC an hneh ṭum hian MPL-a goal khung tam ber F. Lalrinpuia a rawn inlan a, a khel ṭha - Chanmari lakah pawh hian Valpuia hi khel thei tur zingah a tel.

Chanmari leh Mala chungchang sawi zuiin BSa Colney chuan, "Chanmari hi team ṭha an ni a, Mala pawh coach ṭha, nihna anga lang a ni. Coach thar hnuaia khel an nih avangin pressure an ngah zawk dawn. Keini tan point thum hi a pawimawh a, chumi hlawh chhuak tur chuan kan chak ngei pawh ka ring," tiin a sawi.

Police leh Chanmari inkhel tur hi Zirtawpni zan a ni a, tualchhung football ngainatute tan chuan hmaih phal chi a ni lo ang.