MPL9 hmahruaitu zawnna Tlai dar 4-ah Aizawl FC Vs FC Venghnuai

Vawiin tlai dar 4:00 hian tualchhung football class sang hmuh a beisei theih ang. RG Stadium-ah Zote Honda MPL9 hmahruaitu Aizawl FC leh pahnihna FC Venghnuai te an inkhel dawn a, a chak zawkin hmahruaitu ni chungin phase 1 an khar ang.

Khawzawla inelna neih a nih khan Aizawl FC an chesual a, Chhinga Veng lakah hma takah goal hnih an chhuah. I League club hi an insiamṭha vat a, first half-ah vek goal hnihin an chhanglet. Amaherawhchu second half-ah goal a luh zui loh avangin AFC hian point khat chauh an hlawh chhuak.

Aizawl FC hian match hnuhnung berah point khat chauh hlawh chhuak mah se minute 90 thlirin Chhingcows lakah team ṭha zawk an ni tih an pholang a, FC Venghnuai lakah pawh team ṭha zawk an ni ang.

I League club hi an squad a chhah a, goal khungtu pawh player 11 an awm tawh! MPL best forward leh top scorer ni tawh MS Dawngliana bakah R. Lalthanmawia ten goal hnih an khung a, player dang pakuain goal khat ṭheuh an khung.

FC Venghnuai erawh season bul ṭan ṭha lo mah se tunah erawh an che ṭha tluang leh tawh a, hmahruaitu ni thei dinhmunah an ding hial. Venghnuai vannneihna chu RG Stadium bul lawkah an awm avangin ṭantu an ngah ṭhin a, Aizawl FC lakah pawh ṭantu an nei ṭha zawk ang.

Chutihrualin Lalrindika Hmar hnathawh sawi nep chi lo a ni. Rindika chuan, "Keini chuan chhuan tur kan nei lo, kan team boruak ṭhatna hi ka hmachhuan ber a ni," tiin Vanglaini a hrilh.

Venghnuai hian goal 10 an khung tawh a, goal khung tam lamah Aizawl FC chiah an tluk lo. Goal venhim lamah Venghnuai hi AFC aiin ṭha zawk mah se Chhinga Veng leh Mizoram Police an tluk lo thung. I League club lakah hian Venghnuaiin tlarhnung an ngaih pawimawh a ṭul ang.