Remsiami ten silver medal la

Mizo nula Lalremsiami Hmar chu 2022 National Games of India neih zawh takah khan Punjab tan a khel a, hmeichhe hockey final-ah Haryana 1-0 in an hneh lo, silver medal erawh a dawng phak tho.

Olympian Remsiami hian hlawhtlinna tam tak a chang tawh ṭhin. National Games bikah tak erawh tun ṭum hi medal a lak vawi khatna a ni. Inelnaah hian Mizoram hmeichhe hockey team chu inlan turin an tling phak lo.

Punjab tan Remsiami hian goal nga a khung a, tlarhma lama an player rinrawl a ni. Final-ah erawh a vanduai, goal khung ngei theihna tur remchang vawi hnih nei mah se a hlah ve ve a ni.

National Games hmeichhe hockey-ah hian Champhai nula KT Lalhlimpuii chu umpire a ni. Player a nih laia India camp zawm tawh, goalkeeper hlui Hlimpuii hian pool match zawng zawng bakah, quarterfinal, semifinal leh pathumna zawnna inkhelte a enkawl.