BCCI rorelna sangah CAM secretary

India rama cricket thuneitu sang ber chu Board of Control for Cricket in India a ni a, chumi a rorelna sang chu BCCI Apex Council a ni - hetah hian Cricket Association of Mizoram honorary secretary Mamon Majumdar a tel dawn.

BCCI Apex Council-ah hian office-bearer mi panga - President, Secretary, Vice President, Treasurer leh Joint Secretary an awm, anni bakah hian member pakhat a awm theih, chu hmunah chuan chuhtu nei loin Mamon hi a tling a ni.

CAM honorary secretary Mamon-a chuan, "India rama crikcet rolrelna sang bera kan tel ve thei ta mai hi a lawmawm. Pathian min duhsakna leh kaihhruaina bakah CAM lama member leh ka thawhpuite zawng zawng duhsaknain he nomination hi ka thehlut. BCCI Secy. Jay Shah min thlawp tlatna a pawimawh hle.

"Mizorama cricket kan khelh hmasak hunte ka ngaihtuah a, hun harsa leh pawisa pawh kan neih loh laia club lo kalpui hram hram tute rilruah an lang. Anni vanga tun dinhmun hi thleng kan ni a, kan zavaia thawhrah a ni," tiin Vanglaini a hrilh.

BCCI hnuaiah Mizoram hi full member a ni tawh a, mipa leh hmeichhe senior bakah kum bithliah hrang hrang inelnaah Mizoram hian team a tir ṭhin. Kum thum chhungin tualchhung player ten eizawn nan cricket an hmang tawh tihna a ni.

Mamon-a chuan sawizawmin, "CAM tana ka thawhpui ṭhinte leh thawhpui mekte chungah lawmthu ka sawi a. BCCI chungah pawh India hmarchhak state te hi min ngaihsak avangin lawmthu ka sawi," tiin a sawi bawk.

October 18, Thawhlehni hian BCCI hruaitu thar thlanna hi Mumbai-ah Annual General Meeting ruala neih a ni ang.