Mizoram cricket team inlan hun

India ram chhunga state hrang hrang cricket hmanga inelna - Syed Mushtaq Ali Trophy-ah vawiin hian Mizoram team an inlan dawn, an match hnihna tur niin chawhnu dar 1:30 hian Vidarbha an hmachhawn ang.

Mizoram hian an match hmasa zawkah Mumbai an ngam lo. Saurashtra Cricket Association Stadium Ground C-a inkhelah run 98 chauh an siam a, team ṭha lakah an che thei lo, vawiinah erawh run tam zawk an siam thei tawh tura beisei a ni.

Mizoram hi Group A-ah Assam, Madhya Pradesh, Mumbai, Rajasthan, Uttarakhand leh Vidarbha te nen an awmkhawm. Season hmasa lama team nem deuh an dahkhawmna 'Plate Group' ang kha a awm tawh lo, hnehna chan a awlsam dawn lo.