De Zerbi hnuaiah Brighton an chak dawn em?

Brighton & Hove Albion-in Graham Potter thlak nan Roberto De Zerbi an lalut a, Italian manager hnuaiah Seagulls-in chak an la nei lo. Zanin dar 12:30 hian Brentford Community Stadium-ah Brighton hian Brentford an hmachhawn dawn a, Seagulls-in De Zerbi hnuaiah chak hmel hmuh an inbeisei ang.

Brighton hian De Zerbi hnuaia an match hmasa berah Liverpool an hmachhawn a, ṭha taka inkhel bul an ṭan chungin 3-3 in inkhel a tawp. Reds zawh hian Seagulls-in Tottenham an hmachhawn a, game mawi an khel chungin 1-0 in an chak lo.

De Zerbi hote hian an phu ang tawk result an la hmu lo tiin a sawi theih a, tun hnaia khel ṭha lo Bees laka point thum hmuh hi a pawimawh ang.