Barcelona tan Champions League a tawp hnai?
Champions League match-ah Barcelona-in goal thum khung mah se goal thum an chhuah a, an mikhual Inter Milan nen 3-3 a an inhnehtawk avangin Champions League-a an dinhmun a derthawng ta hle.
Barcelona tan Ousmane Dembele chuan goal hmahruai khung mah se Inter-in Nicolo Barella leh Lautaro Martinez goal hmangin an chhanglet a, Robert Lewandowski chuan si phurh sutna goal a rawn khung zui ve leh.
Mahse, Inter tan Robin Gosens chuan minute 89-naah hmahruaina goal a khung leh a, injury time-a Lewy-a goal-in Barca a chhanhim hram - mahse, Catalan club dinhmun a derthawng ta.
Group C inkhel dangah Bayern Munich chuan 4-2 a Viktoria Plzen hnehin an tlang a, Barca tan hmabak match hniha an chak ve ve a, Inter an chetsual a ngai.
Beiseina thamral
Barcelona-in an tlawm chuan Champions League an mangṭha a ṭul dawn tih an hria a, chance pawh an nei hma - mahse, Lewy ball tauh ṭha zet chu Henrikh Mkhitaryan chuan goal line-ah a lo dang a, Barca tan a uiawm takzet.
Inter an awm mai mai bik lo - a hnu lawkah Edin Dzeko chuan uiawm takin bar a tih per a, Mkhitaryan-a'n chance duhawm a hlah bawk. Nou Camp-a inkhelah team pahnihin chak an tum ngam a, a hmuhnawm takzet.
Dembele leh Sergi Roberto ten uiawm taka an tih goal loh hnuah Dembele a vannei ta nge nge - Roberto siamsak chu awlsam takin minute 40-naah a pet goal a, Nou Camp boruak a pui hle.
Goal dang lut loin chawlhlawk hman a ni a, Barca hlim chhung a rei lo - second half ṭan aṭanga minute ngana lekah Alessandro Bassani ball thlawh luh chu Nicolo Barella chuan a pet goal a, Gerard Pique-a'n ball kal dan a chhut sual vanga lut a ni.
Tlarhnung nghing
Barcelona tlarhnung a nghet ṭha tawk lo a, minute 63-naah Martinez chuan awlsam zetin Eric Garcia a bum a, an goal hnihna a khung - Nou Camp thawm a reh zui a, fans an mangang.
Mahse, Barca fan-te mangan lai takin Lewy a inlar - Polish striker hian minute 82-naah si phurh a rawn sut a, a ban vai vir chungin a ṭhiante a fuih a, Bayern Munich chhuahsantu striker hian hnehna chan a duh.
Beisei angin thil erawh a kal thei lo.Minute 89-naah Martinez chuan Barca tlarhnung pherh chu hmang remchangin Robin Gosens tan a siamsak a, German fullback tan goal khung harsa a ni lo.
Hun pek belh minute hnihnaah Lewandowski chuan si phurh sutna goal a rawn khung ve leh a, Polish striker-in beiseina tlem an la neih ve chu a rawn chhem nung.
A harsa ta
Barcelona-in Champions League-ah match hnih khelh tur an la nei a, Bayern Munich mikhualin, Viktoria Plzen an la lenchilh dawn bawk - Catalan club tana tih tur hmasa chu he match hniha chak ve ve a ni a, chumi hma chuan Pathianni zanah El Clasico an la khel leh phawt dawn.
Mahse, an kutah an innghat tawh lo - Inter-in Viktoria mikhualin, Bayern an la lenchilh dawn a, Barca chak ve ve pawh ni se point thum an hmuh chuang an tlang dawn!
Barcelona boss Xavi chuan, "Last 16 lut turin midang kutah kan innghat tawh - kan tihsual a ni a, insiamṭhat kan mamawh a ni. Chu chu thil nihna dik tak a ni a, kan rin aiin Europe-ah chuan insiamṭha turin hun a ngai rei a ni.
"Inelna dang La Liga, Copa del Rey leh Super Copa a awm a, kan beih a, theihtawp chhuah zel a, kan inrintawk a ngai. Mahni mualah, heti zat fans nena draw result kan nei thei hram a nih chuan ka thiam loh a ni. Ka thin a rim a, ka ngaihdanah chuan Champions League hian kan chungah a nunrawnna a la chhuah zel rih a nih hi," a ti a, beisei a nei tlem ta hle.