Egyptian King a lo kir e - Liverpool an chak

Mohamed Salah chuan Rangers lakah minute ruk chhungin goal thum a khung a, Champions League-a hattrick siam rang ber record thar a siam.

Liverpool chuan Nilaini zan khan 7-1 in Rangers an sawp a, Champions League last 16 an hnaih zel - Reds tan Salah bakah Roberto Firmino chuan goal hnih a khung a, Darwin Nunez leh Harvey Elliott ten goal khat ve ve an khung bawk.

Reds hian Pathianni zan dar 9:00-ah Manchester City an mikhual dawn a, Pep Guardiola enkawl team hmachhawn hmaa goal sarih ngawt khung hi Jurgen Klopp tan a lawmawm ang.

Goal a sur
Ibrox Stadium-ah Rangers-in Scott Arfield hmangin goal hmahruai an khung a, Liverpool fans tam tak thin a rim hman - mahse, Reds ṭantute thinlung thawi dam nan Firmino a inlar a, Kostas Tsimikas-a corner chu awlsam takin a tauh goal.

Goal dang lut loin chawlhlawk hman a ni a, second half chu Liverpool chanpual a ni. Minute 55-naah Firmino-a'n tun season-a a goal riatna a khung a, Nunez chuan Reds a pan hnua a goal lina hmangin a belhchhah bawk - Liverpool an hawi kir tawh lo.

Klopp-a'n City an hmachhawn tur hre rengin Nunez a hahdamtir a, a aiah bench lama hahdam Salah a luhtir. Egyptian forward hian goal thum a khung zui a, amah ang thoa bench aṭanga lut Diogo Jota siamsak vek a ni - Elliott chuan a tawp kharna goal a khung zui a, a tirah offside vanga pawm ni lo mah se VAR hmanga ennawn a nih hnuah pawm a ni.

Klopp a hlim
Liverpool boss Jurgen Klopp chuan, "Chawlhlawk lai khan ṭha takin thil kan sawi a, a thawk ṭha a ni ang, second half-ah kha chuan chak duhin kan tuihal a ni. Kha aia ṭha zawk kha beisei theih a ni lo a, ka lawm takzet a ni," a ti.

German coach chuan sawi zawmin, "Kan goal khungte a ṭha em em vek a, kan tana ṭha turin thil a thleng zel a, kan hlim phah khawp mai. Mahse, Pathiannia kan hmachhawn tur kan hre reng a, a danglam dawn. Chutihrual chuan zanina kan lawmna anga tawng chu hmachhawn chu kan tan a ṭha zawk a ni," a ti a, City nena an inkhel tur a thlir lawk.

Liverpool hian tun season-a league match riat an khelhah vawi hnih chiah chak an la nei a, an match hnuhnung berah Arsenal an ngam lo - City hmachhawn hmain an chak a, team boruak a ṭhat phah ang.

Napoli an tlang
Group A inkhel dangah Napoli chuan 4-2 in Ajax an hneh a, match li an khelhah an chak vek avangin last 16 an lut chiang - Italian club tan Hirving Lozano leh Giacomo Raspadori te chuan minute 20 tlin hmain goal hnih an khung der.

Ajax tan Davy Klaasen chuan minute 49-naah si phurh sut ṭhenin, beiseina rawn siam ve mah se, Napoli tan Khvicha Kvaratskhelia (penalty) leh Victor Osimhen ten an khung belh - an pahnih goal khung kara Steven Bergwijn-a penalty goal chu scoreline timawitu chauh a ni.

Napoli an tlang a, Ajax tan match hmabak pahniha Liverpool leh Rangers hneh a, Reds an chetsual a ngai - Klopp-a naute tan match hnih aṭanga point khat hmuh a tawk a, Liverpool tan group hmahruaitu ni chunga lut turin chak bakah goal khung tam a ṭul ang.