Spurs tan Son Heung-min leh Kane

Tottenham Hotspur chu Champions League group D hmahruaitu an ni mek. Spurs hian Nilaini zan khan an mikhual Eintracht Frankfurt chu 3-2 in an hneh a, forward Son Heung-min-a'n goal hnih a khung bakah Harry Kane chuan penalty a chhuih lut bawk.

Inkhel tir lamah Eric Dier tihsual vangin Daichi Kamada-a'n goal hmahruai a khung a, mahse chawlhlawk hmain Son-a goal hnih bakah Kane-a penalty hmangin an chhanglet hman a, 3-1 in chawlhlawk an hmang.

Second half minute 59-naah defender Silva Melo chu yellow card pahnihna vangin hnawhchhuah a ni a, goal an phurh bakah player tlem zawk an nih vangin German club tan beisei a tlem, mahse hun tawp dawnah Faride Alidou-a tauh luh hmangin an sut ṭhen.

Hun tawp hma chiahin Spurs lamin penalty an hmu nawn, striker Kane-a'n chak nemngheh theihna remchang ṭha bik nei mah se a khung lo. October 26-ah Sporting Lisbon an mikhual leh dawn, an chak chuan last 16 an lut ang.

Antonio Conte nauten a tir lamah tihsual an nei ngei a, mahse a hnu lama an insiamṭhat dan erawh a hmuhnawm hle. Kane leh Son an inkawp fuh leh tawh viau, an goal khatna pawh Kane-a'n a siamsak a ni, season hmasa lama an hlauhawm ang kha kan hmu chhunzawm mai thei.

South Korea international hi hun tawp hma deuhin lak chhuah a ni a, season hmasa Premier League top scorer hi Spurs fans lamin kut bengin zahna chibai an buk. Kane nen an inkawp karah Richarlison an neih belh tak avangin tlarhma an nei ṭha hle.

Italian manager Conte tana thu lawmawm pakhat chu Lucas Moura a dam leh ta kha a ni. Hliam vangin Moura hi August thla hnu lama a inkhelh lehna hmasa chauh a ni a, player dang tan elpui tur a nih bakah, match khelh tur an ngah avangin manager-in duhthlan tur a ngah leh ta sawt.

Spurs manager Conte chuan, "Kan khel ṭha, hun tawp lama kan chet danah erawh zir tur kan la nei. A nihna takah chuan kan chesual teuh hle. Last 16 chungchang chu kan kutah engkim a innghat, kan inpettling thei a nih chuan thil ropui tak a ni ang," tiin a sawi.

Tottenham hian Inrinni zanah Premier League khel turin Everton an mikhual zui leh nghal ang.

Champions League group D inkhel dangah Marseille chuan Sporting Lisbon 2-0 in an hneh a, point ruk an hmu. Marseille leh Sporting te point neih zat a inang a, hmahruaitu Spurs an phak lohna point khat chauh a la ni - a la ngaihnawm zel dawn.