East Bengal an tlawm leh ta

India coach hlui Stephen Constantine enkawlna hnuaiah East Bengal-in eng an ang thei lo - Nilaini zan khan FC Goa chu mahni mual ngeiah 2-1 in an ngam lo a, match hnih chu a zawnin an tlawm ta.

FC Goa tan Brandon Fernandes leh Edu Bedia ten goal khat ve ve an khung a, Kolkata club tana Cleiton Silva penalty chhuih luhin awmzia a nei phak lo - Goa tana ISL season hnih khel tawh Carlos Peña-a'n coach ni chunga ISL-a a match hmasa berah Goa a chakpui.

Stephen Constantine chuan, "Second half-ah kan khel ṭha a, khatiang taka khelh kha kan duh dan chu a ni. Mahse, minute 45 chauh kan khelh ṭhat avangin a tawk zo lo a ni," a ti.

Inkhel chu
Salt Lake Stadium-a inkhelah East Bengal fans 17,000 chuang an pungkhawm a, mahse, anni ngawihtir tur hian Goa-in minute riat bak an mamawh lo - Brandon Fernandes chuan minute riatna lekah goal hmahruai a khung a, Spanish striker Alvaro Vazquez siamsak a ni.

East Bengal-in first half-ah Silva hmangin si phurh sutna remchang nei mah se an chhawr lo a, penalty an beisei aiah freekick pek an ni bawk - minute 60 hnuah erawh Kolkata club an vannei ta nge nge a, Jerry Lalrinzuala ball thlawh luh duhthusam chu Suhair VP-a'n a lak hmain Goa keeper Dheeraj Singh-a'n a titlu a, penalty a chawi.

Brazilian striker Cleiton Silva chuan harsatna nei loin goal-ah a chantir. Goal dang kan hmu lawk lo a, team pahnihin point an insem ngei dawn niin a lang hman - mahse, hun pek belh minute linaah Edu Bedia chuan freekick hmangin goal a khung a, Goa an chak daih!

Mizoram player
Durtlang tlangval Lalchungnunga'n East Bengal tan inkhel bul a ṭan leh ta a, Aizawl FC leh Sreenidi Deccan defender hlui hi ISL-a a season hmasa berah a tlangnel nghal hle - Jerry pawhin Kolkata club tan bul a ṭan.

Kum 2016 aṭanga Chennaiyin tana khel tawh Jerry hian a career-a a vawi khat nan ISL club dang a zawm a, match hmasa berah bench aṭanga luhtir a ni a, Goa lakah bul a ṭan - mahse, an chak loh ve ve avangin a mangphan bul ṭanna chu a ni lo ang.

Goa lamah, Mizoram chhul chhuak, Aizawl FC player hlui Ayush Chhetri chu minute 66-naah bench aṭanga luhtir a ni a, AFC tana a hmuhnawm ang tho khan a la hmuhnawm reng.

October 12, Nilaini Zan
East Bengal 1 - 2 FC Goa
EAS: Cleiton Silva 64' (P)
FCG: Brandon Fernandes 8';
Edu Bedia 90+4'

Zanin Inkhel Tur
Chennaiyin FC 7:30 PM Bengaluru FC