Brugge-in Atletico an chelh

Tun season Champions League-ah Atletico Madrid-in beisei an pha lo, Nilaini zan khan Diego Simeone hote hian Metropolitano Stadium-ah Club Brugge an mikhual a, 0-0 in an inhnehtawk.

Atletico hian match li aṭangin point li chauh an hmu a, inkhel dangah Porto-in Xabi Alonso kaihhruai Bayer Leverkusen 3-0 a an hneh avangin Portuguese club-in point ruk an hmu. Simeone kaihhruai Atletico hi tla thei dinhmunah an ding.

Metropolitano Stadium-ah hian Atletico hian inkhel thunun mah se Simon Mignolet an paltlang thei lo, Liverpool keeper hlui hian tun season UCL-ah goal a la chhuah lo!

Club Brugge forward Kamal Sowah chu minute 82-naah hnawhchhuah a ni a, hun tawp lamah player 10-a an khel chungin goal an venghim. Result neih ṭhat tawk loh avangin Diego Simeone dinhmun a derthawng nia sawi a awm a, club president-in a chhan thung.

Atletico Madrid president Cerezo chuan, "Pathianin rem a tih phawt chuan hun rei tak a cham ang," tiin Simeone-a'n manager hna a chelh zel tur thu a sawi.

Belgian club Brugge erawhin result ṭha tak an nei a, an mualah Atletico hi an hneh tawh avangin Spanish club ai hian head to head-ah an ṭha zawka match hnih khelh hmabak nei chungin knockout stage an lut.