WTA Finals atan Pegula a tling

Jessica Pegula chuan CoCo Vandeweghe 6-3, 6-1 in a hneh a, harsa vak loin San Diego Open quarterfinal a in vaw kai. American player hi season tawpa a thiam zual pariat inelna WTA Finals atan a tling chiang nghal ta bawk.

World number 6 hian hnehna chang turin hun a mamawh rei lo, set hnih an khelh chhunga game li chiah a hloh avangin dinhmun chhiat lai a nei lem lo. A match lehpekah chuan Madison Keys leh Daria Kasatkina inkhela chak zawk a hmachhawn ang.

Season kal laia Grand Slam paliah Pegula hi champion lo mah se quarterfinal a lut phak vek a, a tan kum ṭha tia chhiar theih a ni. WTA Finals khel tur hian ani bakah Iga Swiatek leh Ons Jabeur te an lo tling tawh bawk.

Kum 28 mi Pegula chuan, "Vandeweghe kha a service a hlauhawm hle tih ka hria, chumi lo dawng sawng thei tur chuan ka inbuatsaih nasa hle a, ka hlawhtling pawhin ka hria," tiin a sawi a, a sang thei ang ber thlen a tum.

WTA Finals hi October 31, Thawhṭanni aṭanga November 6 chhungin Fort Worth, Texas-ah khelh a ni ang.