Premier League Club Bihchianna Brighton fachuam Lewis Dunk

Brighton & Hove Albion FC tan kumin hi Premier League season thum an khelhna chauh a ni a, season hnih an inham tang hram. Seagulls hian tun season-ah pawh relegate loh tumin ṭan an khawh a, tunah hian 15-naah awmin neutral ground-a Premier League khelh chhunzawm duh loh zingah an tel.

Brighton & Hove Albion Football Club hi June 24, 1901 khan din a ni a, Seagulls emaw Albion emaw tiha koh ṭhin an ni. A tirah chuan Brighton hi Southern League-ah an inkhel ṭhin a, he inelnaah hian 1910 khan an champion. 

Kum 1920 khan Football League hnuaiah Third Divison din ṭan an ni a, Brighton pawh Football League hnuaiah an inziaklut. Kum 1957-1958 khan Third Division-ah hian an champion a, Second Division khel turin an tling. 

Kum 1960 chhoah Brighton-in hun harsa a tawng a, Fourth Division-ah hial an tla thla. Kum 10 hnuah erawh Brighton hma hun a rawn êng chho a, kum 1979-ah phei chuan hetih hunlaia inelna sang ber First Division khel turin an inpet kai.

Kum 100 chuang club ni tawh mah se Seagulls hian nomawi lian tham an la chawi lo. Inelna lian thama an thlen san ber chu kum 1983 kha a ni a, hemi ṭum hian FA Cup final thlengin Manchester United an hneh lo.

Brighton-in league sang bera khelh an harsat a; First Division, Second Division leh Third Division-ah te in awm chhawkin 2011 aṭangin Championship-ah an inbeng bel a, 2016-17 season-ah Championship-ah pahnihna niin Premier League khel turin an tling.

Football club tan an awmna khua aṭanga player ṭha an rawn chhuah hian vanneihna a ni a, fan-te pawhin an ngaina bik ṭhin. Brighton pawhin chutiang player chu an nei a, a hming chu Lewis Carl Dunk a ni.

November 21, 1991 khan Brighton-ah Lewis Dunk a rawn piang a, a pa hi non-league player Mark Dunk a nih avangin chhun tur pawh a nei ṭha. Dunk hian Brighton academy a zawm a, captain armband te hreng chhoin April 30, 2010 khan kum 18 mi chauh nihin professional contract zawrh a ni a, kum hnih daih contract a ziak.

Dunk hian 2013 khan Bristol City-ah intuai hriam turin loan hmangin a zawm a, match hnih chauh a inlan. Brighton erawhin an fachuam theihna an hrechiang a, kum 2014 khan kum li daih contract an ziahsak a, an tifuh hle. Defence laiah Dunk leh Shane Duffy te an inkawprem ṭha a, 2016–17 season khan Championship-ah Brighton pahnihna nih puiin Premier League khel turin a tlinpui. Hemi season hian goal 40 chauh chhuahin pakhatna Newcastle United nen goal chhuah tlem ber an ni a, Dunk hi Team of the Season-ah a tel pha.

Premier League-ah pawh Dunk hi player pawimawh a ni zel a, Brighton pawhin October 5, 2018 khan kum 2013 thleng contract an pawhseisak. Tun season ṭantirh khan Dunk hi club captain atan puan a ni a, nikum November thla khan Manchester Utd leh Liverpool lamah a khung. 

Dunk hian Brighton tan Premier League match a khel hnem ber a, vawi 101 a inlan tawh. Goal leh assist pawh vawi nga ve ve a nei tawh a, Seagulls tana record nei ṭha zingah a tel pha a ni.