Verstappen-a'n a la duhtawk lo

Max Verstappen chuan a team Red Bull nen season tharah pawh an champion leh theih a beisei a, world champion vawi hnih ni tawh mah se a thlen chin aṭanga hmasawn zel a tum - tawp san mai a la tum lo hle.

Dutch tlangval hian Japanese Grand Prix-ah hnehna changin world champion a nihna a nemnghet a, a kum zawnin F1 title a la. Kum 25 mi chauh a la ni a, a chesual viau a nih ngawt loh chuan season tharah pawh rinkai ber a ni leh dawn.

Verstappen chuan, "Car ṭha tawk tak kan nei a nih phawt chuan, kumin chauh ni loin season thar lo awm zel turah pawh hma kan hruai leh theih ka ring. Hnehna chan mai pawh ni loin kan la champion zel theih pawh ka ring.

"Chutih rualin engmah hi sawilawk theih a ni bik lo. Team dang pawhin hmasawn tumin theihtawp an chhuah vek, kan inthlauhna a tam loh avangin in lehthal thei reng chu kan ni ve bawk," tiin a la ṭawng fimkhur viau.

Driver champion awm chiang tawh mah se intlansiak hmabak pali ngawt an la nei. October 23, Pathianni zanlai dar 12:30 hian United States Grand Prix an tlan leh ang. Ram pali hian inelna hmuhnawm ber erawh an en lo ang tih a rin lawk theih.

Max-a elpui Lewis Hamilton chuan Red Bull driver hi fakin, "Max hian champion-in an tih tur ang zawng zawng chu a ti vek," a ti. Intlansiak vawi 15 an hmachhawn zinga vawi 11 zetah Verstappen hi a chak thei a, a chungnung takzet.