China-a kal tur an ṭhulh

India nula hockey khel thiamte chu Olympic atana inbuatsaih turin China rama kal an tum a, mahse cornavirus hri leng mek vangin Hockey India chuan an zin tum hi an ṭhulh.

Kar hmasa khan New Zealand-ah India team hi an zin a, New Zealand bakah Great Britain te nen an inhmachhawn. Olympic khel tura tling tawh Lalremsiami Hmar telna team hi ruahman dan chuan March 14-25 chhung hian China rama zin tura tih an ni, amaherawhchu an kal dawn lo.

India captain Rani chuan, "China rama kal kan tum chu ṭhulh a ni a, kan kal dawn ta lo. Thil thleng thei tam tak a awm, player leh coaching staff lam himna tur kan ngaihtuah zawk a ngai a ni," a ti.

Nikum khan India hian FIH Olympic qualifier-ah United States hnehin Olympic atan an tling a, a vawi thum nan India nula te an inlan dawn. Hrileng vanga inelna lian an ṭhulh a nih ngawt loh chuan Japan rama inelna lianah an inlan ang.