May 16-ah Bundesliga chhunzawm dawn

Beiseina nen an nghak a, hlauhthawng rilru taka an thlir dek dek chu a chhanna an hmu ta. May 16, Inrinni aṭangin Bundesliga leh Bundesliga 2 te chu a hmuna entu awm loin an khel chhunzawm leh dawn.

Nilaini zan khan German chancellor Angela Merkel leh sorkar hruaitute chuan league khelh chhunzawm phalna an pe. Match neih ṭan hun tur erawh German Football League (DFL) lam ruahman a ni thung.

Nimin tlai khan Bundesliga leh Bundesliga 2 club aiawhte an inhmukhawm, league khelh chhunzawm chungchang hriat tur pawimawh leh inkaihhruai dan tur ṭhenkhat an sawiho. Match an neih ṭan leh kar tawpa inkhel tur zingah Schalke leh Borussia Dortmund inhmachhawn tur a tel.

Coronavirus vangin Dutch League leh French Ligue 1 a tawp fel tawh. Hri leng tamna Italy leh Spain rama Serie A  leh La Liga club-ten training an nei ṭan leh tawh thung a, European league lian zinga a hmasa ber turin Bundesliga an khel zui leh tur hi Premier League hmahruaitu Liverpool tan chanchin ngaihnawm a ni ang.

Covid-19 vangin March thla laihawl aṭang khan German football hi an chawl lailawk tawh. April thla chawhnu lam aṭang khan training an nei leh tawh a, an beisei dan chuan May 9 hian khelh chhunzawm theih an inring.

Mahse, sorkar thuneitu lam aṭangin DFL lamin remtihna an hmu mai lo a, an tum ang hunah an ṭan thei lo. Tun kartir lam khan football kaihhnawih mi 1,724 an endik zinga 10 chuan hri leng an kai, inkhelh chhunzawm rih loh rinna a lian hman.

TV lama inkhel pek chhuahna, sumdawnna leh DFL inrem dan chuan June 30 ral hmain league hi khelh zawh a ngai. An hun tiamah an khel zo hman lo emaw, league an khelh chhunzawm lo a nih chuan sum tam tak an hloh dawn bawk si, division sang pahniha club 36 zinga 13 chu sum lama buai thei an ni - DFL lu a hai hman hle.

Amaherawhchu, sorkar lamin an beisei an ti hlawhtling. Chancellor Angela Merkel chuan, "Dan leh hrai siam thar hnuaiah inkhelh theih a ni ang," a ti. Entu an awm dawn loh bakah player leh hnathawktu dangte chu a khat tawka endik reng an ni ang.

German Football League (DFL) chief executive Christian Seifert chuan, "Tuna thu thar hi Bundesliga leh Bundesliga 2 tan thil ṭha tak a ni. Entu awm loa inkhelh chhunzawm hi thil duhawm ber chu a ni a, mahse tunlai boruak thlirin hetiang baka kalpui dan tur ṭha zawk a awm chuang lo," a ti.

Hripui leng vangin October 24 thleng chu German ramah mipui tam tham punkhawm khap a ni; season thar pawh a nghawng dawn. Nimin tlai thleng khan an ramah hian hri leng vangin mi 7,000 chuang an thi tawh - UK, Italy, France leh Spain-ah te ai chuan thi hi an tlem deuh zawk.

Bayern Munich chairman Karl Heinz Rummenigge chuan, "Ram hruaituten Bundesliga khel chhunzawm leh tura thu an tih tluk avangin kan lawm takzet. May thla laihawl kha kan beisei a ni a, tunah chuan kan duh angin thil a thleng dawn niin a lang.

"Kan inkhelh dawn avangin club chungah mawhphurhna a sang, tu pawhin thu an awih tur a ni. Tun hma lama kan boruak ang kha neih leh nghal vut vut beisei tur pawh a ni rih lo, fimkhur tlang taka kan kal a ngai ang," a ti.