Dinthar aia Ramhlun N sanna own goal

Mizoram Premier League a ngaihnawm chhunzawm a, nimin tlai Lammuala inkhel hmuhnawm takah Ramhlun North FC-in an elpui Dinthar FC 2-1 in an hneh.

Ramhlun North-in Maimawms hi 2-1 thoin round 2-ah an hneh tawh a, hemi ṭuma own goal khungtu Dinthar captain Malsawma Chhangte chuan own goal a nei nawn! Ramhlun North winger Lalrinfela'n si phurh sutna goal a khung a, Khawlailung tlangval hi a vawi thum nan man of the match-a thlan a ni

Ṭhat dan berin
Dinthar FC-in Nigerian mid­fielder Clarence Carter bul an ṭantir nghal a, tlar hmaah Jackson Victor awm bawkin foreigner pahnihin bul an ṭan.

Ramhlun North lamin defender Korhena A. Boekai chu tlarhnungah an dah nawn a, midfield-ah Harry Delona awm bawkin foreigner pahnih tho an chhawr a, Durtlang tlangval Lalliansanga (Notea) a inhliam hnua a vawi khat nan bul a ṭan leh bawk.

1-1
Dinthar FC-in bul an ṭan ṭha a, Nigerian forward Jackson-a'n keeper chiah a hmachhawn hnuah goal zawnah a pet lo.

Ṭhuamluaia Muala chakna goal khungtu Jackson-a a khel ṭha a, minute 33-naa a goal khungna erawh penalty a ni. Dinthar winger Lalramliana chuan Ramlun North defender Korhena lak aṭangin penalty hi a hlawh chhuak.

Ramhlun North an bet hret a, goal an chhuah hnuah erawh an game a kang nghal. Liberian midfielder Harry ball pek chu Notea'n a dummy hnuah Lalrinfela'n ṭha zetin a pet goal.

Dinthar FC-in hma hruai nawn an tum a, an goal bawh na mah se an khung belh lo.

Danglamna own goal
Ramhlun North-in halftime an hmang ṭha a, second half-a bul ṭan ṭha zawk an ni.

Ramhlun North left back Lal­muan­awma cross chu Dinthar defen­der Malsawma Chhangte-in an lamah a ti-goal a, Maimawms cap­tain hian MPL6-ah own goal vawi hnih a nei ta - mak deuh mai chu Round 2-a team pahnih intum ṭumin Malsawma hian anmahni goal-ah tilut palh tawhin 1-2 bawkin an chak lo tawh a ni!

Inkhel boruak a sang zui a, Ramhlun North forward Notea'n goal ban a pet per a, Dinthar lamin goal chance an insiam thei lo. Referee Lalhriatpuia'n hna a ngah a, nimin tlai inkhelah yellow card vawi ruk zet a phawrh.

Table a danglam
Ramhlun North an chak avangin table-ah panganaah an insawn chho a, point 11 an hmu tawh.

Dinthar chak zo lo mah se point riat hmu dang Mizoram Police leh Chanmari West te nen an intum kualnaa an record a ṭhat ber avangin paruknaah an insawn chho bawk.