United leh goal venhim

Manchester United chuan zanin dar 7:30 hian Huddersfield Town hmachhawn turin John Smith's Stadium an tlawh dawn a, Jose Mourinho naute khelh dan tur hmang chu hriat châkawm a ni.

United hian Anfield an tlawh ṭumin goal venhim chu hna berah an nei a, an hlawhtling. Champions League khel turin Portugal-ah an zin chhunzawm a, goal nawr aiin goal venhim an ngai pawimawh a, Benfica keeper Mile Svilar tihsual zarah 1-0 in an chak leh bawk.

Amaherawhchu, Red Devils hian an tlarhnung phui ṭhat an hlawk pui a, league-ah goal hnih chiah an la chhuah. Jose Mourinho chuan, "A chang hi chuan goal venhim sual ang hialah an ngai ṭhinin ka hria, amaherawhchu chutiang chu a ni lo," tiin an khelh dan hmang chu dik lohna awm loh thu a sawi.

An record sawi chhunzawm Mourinho chuan, "Match 12 kan khelh tawh aṭangin vawi 10 kan chak a, vawi hnih kan draw a, vawi kua clean sheet. Kan record hi chhia han tih tur chu a ni lo," tiin chhuang takin a sawi.

Thla liam ta khan Portuguese manager hian Victor Lindelof leh Chris Smalling te chu starting eleven a tel ngun zawk Phil Jones leh Eric Bailly te tlukpui tho an nih thu a sawi. An defender pawimawh Bailly inhliam leh takah chuan Mourinho hian tlarhnung pawh a siksawi nasa a, vei lama hman theih Matteo Darmian, Ashley Young leh Daley Blind te pawhin khelhna hmun inchan chhawkin result

aṭanga thlir chuan an la khel ṭha tlang tiin a sawi theih.

United hian zanina Hudders­field Town laka goal an chhuah loh chuan Premier League history-a match hmasa pakuaa vawi riat clean sheet thei hmasa ber an ni ang. Kai thar Huddersfield hian season bul ṭan ṭha mah se result ṭha an nei ṭha chhunzawm thei lo a, August thla tawpa Newcastle United an hneh hnuah league match vawi ruk an khel leh tawh nachungin chak hmel an hmu lo a, vawi thum an chak lo bawk.

Hei vang hian United ṭantuten kai thar laka goal an chhuah loh vang ngawtin an lawm dawn lo a, John Smith's Stadium-ah point thum an hmuh chauhin an lawm ang.