Magpies fan-ten club hralh an thlawp

Newcastle United hralh tumnaah Saudi Arabia an inhnamhnawih avangin sawiselna tam tak awm mah se Magpies fan-te chuan an club hralh hi an thlawp thu an sawi a, hetihrual hian dik lo a awm a nih erawh chuan huai taka an sawi lan ṭhin tur thu an sawi tel. 

Magpies hi PCP Capital Partners, Saudi Public Investment Fund (PIF) leh Reuben Brothers-te ṭangkawp chuan lei an tum a, Saudi PIF hi sum thawh hnem ber tur niin 80% share an nei dawn bawk. 

Mihring dikna chanvo rah behna kawnga ram hmingchhe tak Saudi inrawlh tak hi mi tam takin an duh lo a, human rights group ṭhenkhat leh Saudi sorkarin a thah tir nia an sawi journalist Jamal Khashoggi-a kawppui Hatice Cengiz-te chu Saudi inrawlh duh lo langsar zingah an tel. 

Newcastle United Supporters Trust (NUST) chair Alex Hurst chuan, "Kawng dik lo a zawh dawna club khalh ngil tura din kan ni," a ti a, an club lei tumna chu an thli thlai reng thu a sawi. 

Member 10,000 vel nei NUST hian a member-te ngaihdan a lakah 96.7% vel chuan an club hralh hi an remti. NUST director Peter Maughan chuan, "Ram dang inrelbawlnaah sawi theih kan nei lo a, mahse kan club enkawl danah erawh inrawlh kan duh a ni," a ti a, an club kalpui dan chu an thlir reng tur thu a sawi. 

NUST member leh Amnesty-a thawk bawk Steve Cockburn chuan, "He club zahawmna leh hmingṭhatna venhim hi kan tihtur a ni. Club leitu turah sawi theih kan nei lo a, kan duhdan sawi tur erawhin zalenna kan nei," a ti - NUST hian online kaltlangin an ngaihdan an sawikhawm a, fans 2000 vel an tel.