Spurs-in Liverpool hneh tum

Tun kar tawp Premier League inkhel ngaihven hlawh ber tur chu Pathianni zan dar 8:30 hian Wembley Stadium-ah khelh a ni dawn. Tottenham Hotspur chuan an mikhual Liverpool lakah hnehna chan an tum ruh hle - player pui turin fans thlengin an ṭangrual dawn.

Tottenham hian an khelmual White Hart Lane an siam ṭhat mek avangin Wembley Stadium chu khelmual atan an hmang hawh a, England-a stadium hmingthang hi mipui 90,000 vel lenna niin Liverpool ṭantute ṭhut nan ticket 3,116 bak siamsak an ni lo! Spurs hian an thiamna bakah fans puihna hmanga hnehna chan an tum.

Premier League dan leh hraiah chuan mualneitu lam hian an mikhual tan a tlem berah ticket 3,000 an pe tur a ni a, amaherawhchu an stadium chu mipui 30,000 lenna aia te a nih chuan an mikhual fans tan 10% an zuah tur a ni thung. Tun ṭuma Reds lamin ticket an neih zat hi a percent zawng chuan 3.5% chiah a ni. Mahse, Wembley Stadium hi mipui 30,000 chuang lenna a nih avangin Spurs hian dan an bawhchhe lo.

Spurs hian tun season chhung­in an khelmualah league match li an khel tawh a, Bournemouth chiah an la hneh. Champion lai Chelsea an hneh loh ṭumin fans 73,587 an pungkhawm a, an club-in Blues laka entu tam record an siam hi Liverpool lakah khum ngei an tum a ni.

Spurs fiahna

Mauricio Pochettino kaih­hruaina hnuaiah Tottenham hian hmalam an pan zel a, stadium an sak mek avangin club lian dangte angin player lei nan sum seng hnem lem lo mah se ngelnghet takin an kal thei. Thawhlehni zan khan Spurs hian Champions League-ah Real Madrid chu 1-1 in an inhnehtawk pui a, Spain-a point an hmuh theih vang hian inrintawkna an neih belh ang.

Argentine manager Pochet­tino-a'n Spurs a enkawl tawh chinah Liverpool hi vawi thum a mikhual tawh a, hnehna a la chang miah lo. North London club hian season hmasa anga an khelmuala point hmuh hnem an duh a nih chuan Reds lakah hian hnehna chan ngei a pawimawh ang. Kar lehah Manchester United an tlawh zui dawn a, an fixture a huatak chhoh avangin Spurs tan fiahna a hautak chho dawn hle.

Season hmasa khan Pochet­tino-a'n hmatawngah Harry Kane hmangin a thlawp turin Christian Eriksen, Dele Alli leh Son Heung-min te a nei bawk - an khelmualah league match 19 an khelhah vawi 17 an chak thei. Tun season-ah pawh Poch hian a player ngaite bawk a la hmang a, an khelh fuh ni chuan dan theih loh ang mai an ni.

Mane tel loin

Season hmasa khan Sadio Mane-a'n African Cup of Nations a khelh hlanin Liverpool an talbuai a, tun dinhmunah Senegal international hi vangin a chawl leh mek. Reds hian Champions League-ah Maribor 7-0 in an sawp a, English club zinga khualmuala goal khung hnem thei ber record an siam.

Jurgen Klopp tana thlamuan­pui tham tur chu AS Roma aṭanga a lakluh Moha­med Salah a ni. Egypt international forward hian Reds tan match 13 a khelhah goal riat a khung tawh a, Brazil international Philippe Coutinho, Roberto Firmino leh Georginio Wijnaldum te nen an inkawp a nih chuan Mane awm loh lang miah loa khel thei tur an ni.

Liverpool hian league goal 13 an khung tawh a, goal hmaah an hriam tawk. Mahse, an buaina chu an tlarhnung pawp hi a ni - goal 12 an chhuah tawh. An khingpui tur Spurs erawhin goal nga chiah an la chhuah a, anni aia record nei ṭha zawk chu Manchester khaw club pahnih chiah an ni.