Hliam vanga buai Chelsea

Premier League cham­pion lai Chelsea-in player inhliam an ngah a, league match hnuhnung pahniha Manchester City leh Crystal Palace an hneh tawh loh bawk avangin an buaina su kiang turin vawiin tlai dar 5:00 hian Watford an hneh ngei a ṭul a ni.

Blues hian hliam vangin midfielder pawi­mawh N'Golo Kante leh Victor Moses te an la chhawr thei dawn lo a, Leicester City aṭanga an lakluh Danny Drinkwater-a'n training zawm tawh mah se duhthusamin a la inpeih hman lo ang. Chelsea hian Champions League-ah AS Roma 3-3 in an draw ṭumin defender David Luiz leh midfielder Tiemoue Bakayoko te an inhliam a, an hmalam hun a la chiang lo.

Spanish forward Alvaro Morata a rawn kir dawn a, hei erawh Chelsea ṭantute tana thu lawmawm a tling. Blues hi a zawna vawi thum chak lo thei dinhmunah an ding mah se Stamford Bridge-a an khelh dawn avangin an tan Watford khelh a awlsam sawt bawk ang.

Amaherawhchu, Waford hi dah hniam ngawt thei an ni lo a, manager Marco Silva hnuaiah match riat khelh tawh aṭangin point 15 hmuin palina an ni mek. Player che ṭha ber zinga mi Richarlison-a'n league match sarihah goal thum a khung tawh a, Brazilian forward chuan, "Kan rama ka awm lai khan damdawi tawlhruah min ngai a, ka lu ah silaiin min tin tawh. Hetiang tawn tawh chuan Chelsea hmachhawn chu hlauhna tur a awm lo," tiin Blues a hlauh loh thu a sawi.

Khawthlang media te chuan Chelsea chhung­kuaah buaina a awm ang­in an ziak a, senior pla­yer-te leh manager Conte an inhmu thiam lo an ti. Hei vang hian Italian manager dinhmun a derthawng anga sawi a awm a, amaherawhchu manager-in hna ngai a chelh chhung chuan thuthang anga ngaih a la finthlak zawk. Blues-in nomawi humhim tura an hna hmasa ber chu Watford hneh a ni a, result ṭha a awm chuan buaina dang chu chinfel a awl ang.