Mbappe ringtu Neymar

Khawvel footballer manto ber Neymar chuan rawlthar duhawm Kylian Mbappe puihna zarah Barcelona tana Lionel Messi ropuina ang kha neih ve theih a inbeisei thu a sawi chhuak.

Brazil captain Neymar hian Catalan club chhuahsanin pound maktaduai 200 zetin Paris Saint-Germain a zawm a, French Ligue 1 club tan hian match 10 a khelhah goal kua a khung leh der tawh - goal a khung theih nan hian khelmual sir lehlama hun hmangtu Mbappe chu player pawimawh a ni.

Kum 25 mi Neymar chuan, "Messi chunga ka hnatawh ang tho khan Mbappe hian ka lakah hna thawk ve se ka duh, min puihna ka mamawh a, hmasawn tur chuan kan thawhdunna a ṭhat a ngai a ni," tiin a sawi.

Barcelona-ah chuan Messi chu khawihtiang lo a ni a, coach leh player dangte pawhin player ṭha ber a ni tih an pawm vek avangin an chung en a, ṭha taka a khelh theih nan an pui ṭhin.

Mahni induh tawk ve tak Neymar-a'n PSG a zawm chhan hi sum tam vang chu ni bawk mah se club chhunga player ṭha leh thu ber nih ve a duh vang nia ngaih a ni. PSG hian Neymar tel lo pawhin French champion an ni thei a, sum tam tak an hman chhan langsar tak pakhat chu Champions League nomawi a ni.

Season hmasa khan PSG hian AS Monaco lakah Ligue 1 nomawi an chan a, tun season-ah erawh laklet ngei tumin thapui an tawh a, hmahruaitu an ni mek - Pathianni zan dar 12:30-ah Marseille an lenchilh ang.