Ruah surah pawh Chhinga Veng tho!

Mizoram Premier League Season 6-ah hneh loh la tawng lo awm chhun Chhinga Veng chuan Ningani zan khan ruahsur hnuaiah harsa takin Chan­mari West 2-1 in an hneh a, semifinal lut thei hmasa ber an ni.

Chhingcows hian coach thar Lalsangzuala Hmar hnuaiah match 21 chhung hneh loh an tawng tawh lo a, Chanmari FC-in kum 2013-a veteran coach H. Vanlalthlanga hnuaia an record siam an tluk chiah. Chhinga Veng hian October 20, Zirtawpni zanah Chanmari record tihtawpsaktu Dinthar FC tho an hmachhawn dawn a, Maimawms an hneh theih chuan an record thar an siam ang.

Team thar

Chhinga Vengin Lungleia Chanmari FC an hneh ṭuma starting eleven aṭangin paruk ngawt an thlak a, an foreigner pahnih defender Lassi Adeyemi leh midfielder Olumide Ola­wale bakah Shillong Lajong midfielder hlui Joy Mrong Kharraswai te chuan MPL6-a a vawi khat nan inkhel bul an ṭan.

Inhliam vanga inlan tam lo midfielder Lalchhuanpuia leh Ṭhuamluaia Muala danglamna thlentu Lalkhawpuimawia leh Khawzawl tlangval Vanlal­lawma ten inkhel bul an ṭan a, midfielder pawimawh R. Malsawmtluanga leh goal khung khawl Malsawmfela te chu bench-ah dah an ni.

Chanmari West-in an player thar Benjamin Cooper an chhawr nghal a, an phur thar phah hle.

West Warrior hun

Ruah sur hnuaiah Chanmari West-in ṭan phat aṭangin an nawr a, Liberian forward Ben­ja­min-a a tlangnel nghal a, Van­lalthlamuana leh Lal­remruata-te nen Chhinga Veng tlarhnung an tibuai hneh hle.

Minute 7-na lekah Jacob Lalrawngbawla freekick pet chu Lalengmawia'n a tauh goal zui a, Chanmari West an phur. Darkar chanve chhung West Warrior-in inkhel an thunun zui a, goal dang erawh an khung belh thei lo.

Chhingcows nge nge

Chhinga Veng an inher rem a, defender thar Lassi Adeyemi-a'n tharum hmangin West Warrior foreigner Benjamin-a che tur a dang chat a, hei hi inkhel danglam ṭanna a ni.

Minute 41-naah Chhuanpuia corner pet chu R. Laldinliana'n ṭha taka a tlan luh hnuah kawh zetin a tauh goal a, West Warrior tlarhnung tan tih theih a vang hle.

Chhinga Vengin rilruah an ngam zawk a, midfielder Lalrinchhana luh hnuah an game a ṭha sawt bawk. Minute 69-naah keeper Zo­than­mawia ball vawrh luh chu Khawpuimawia'n a tauh pial hnuah substitute Lalrammuanpuia petin keeper Vanlalhriata dang mah se Dinliana'n chakna goal khung nan a hmang.

Ruah a sur nasat avangin team pahnihin awmze neiin an khel thei lo a, inkhel ṭantirh lama thapui chhuah Chanmari West-in an siphurh sutna turin tha an nei tawh lo.