Midang chunga leng Messi

Barcelona president Josep Maria Bartomeu chuan tun hnaia European competition-a goal 100 khung tlingtu Lionel Messi chu player dang nena khaikhin theih loh khawpa ṭha bik a nih thu sawi chhuak.

Bartomeu chuan, "Ka thu chu ni se football-a chawi­mawina zawng zawng hi Messi kutah ka hlan ang, player dang nena khaikhin theih a ni lo," tiin an thiampuipa a dahsang hle.

Kum 30 mi Messi hian tun season-ah a club tan inelna hrang hrangah match 13 khelin goal 15 a khung leh der tawh a, Catalan club hi La Liga hmahruaitu a nih pui mek.

Bartomeu chuan tun season aṭanga Barcelona enkawltu Ernesto Val­verde chungchang sawi zawmin, "Tun hma lama team a enkawl ṭhin dan kan hre tawh a, a lakah rinna kan nghah ngam ang ngeiin kan beiseina a tih thlawm loh ka ring," tiin a sawi. Barcelona hian Pathianni zan dar 12:15-ah Malaga an mikhual dawn a, champion lai Real Madrid pawhin Eibar an mikhual ve bawk ang.

Real Madrid coach Zinedine Zidane-a'n tunkar tawp hian keeper Keylor Navas leh Raphael Varane te a chhawr thei dawn lo a, hliam dam­hlim Gareth Bale, Dani Carvajal leh Mateo Kova­cic te erawhin Eibar an hmachhawn thei ang.

Zanin Inkhel Tur
Levante 4:30 PM Getafe
Real Betis 7:45 PM Deportivo Alavés
Valencia 10:00 PM Sevilla
Barcelona 12:15 AM Málaga
October 22, Pathianni
Villarreal 3:30 PM Las Palmas
Celta de Vigo 7:45 PM Atlético Madrid
Leganés 10:00 PM Athletic Club
Real Madrid 12:15 AM Eibar
October 23, Thawhtanni
Real Sociedad 11:30 PM Espanyol
Deportivo 12:30 AM Girona