Nomawi chawi tumin kan ṭangrual - De Bruyne
Kevin De Bruyne chuan Premier League nomawi an chawi theih nan Manchester City player zawng zawngte chu an ṭanrual vek thu a sawi - City hian Pathianni zan dar 7:30-ah Burnley an mikhual ang.
Pep Guardiola kaihhruai Manchester City hian league match hmasa pariatah vawi sarih hnehna an chang a, an khingpuite nen vawi khat an inhnehtawk thung; Manchester United aiin point hnihin an sang zawk a, league hmahruaitu an ni.
City midfielder De Bruyne chuan, "Premier League-ah chuan match thum vel kan chesual zeuh a nih chuan a hnuai lamah kan tla thla nghal rawk rawk zel, champion sawi hun a la ni lo a, chutih rual erawh chuan nomawi chawi ngei tumin kan ṭangrual vek a ni," tiin a sawi.
Spanish manager Guardiola-a'n Barcelona leh Bayern Munich lama a ropui tawhna ang neih let tumin hma a la mek a, an inrem fuh chho ṭan ni pawhin a lang. League-ah goal khung hnem ber (29 goals) an nih bakah chhuah tlem ber dawttu (4 goals) an ni bawk.
Belgium international De Bruyne chuan sawi zawmin, "Kan khingpuite na takin kan nawr a, kan tlan tamin ball kan inpe kual hnem hle. Match hmasa aiin a lehpekah hmasawn zel kan tum a, tuna kan kal danah hi chuan manager pawh a lawmin ka hria," a ti.
Zanin Inkhel Tur
Chelsea 5:00 PM Watford
Huddersfield Town 7:30 PM Manchester United
Manchester City 7:30 PM Burnley
Newcastle United 7:30 PM Crystal Palace
Stoke City 7:30 PM AFC Bournemouth
Swansea City 7:30 PM Leicester City
Southampton 10:00 PM West Brom
October 22, Pathianni
Everton 6:00 PM Arsenal
Tottenham Hotspur 8:30 PM Liverpool