TFL chhunzawm dawn
Mizoram Taekwondo Association buatsaih GIG Motors Taekwondo Fight League chu zanin hian Electric Veng YMA Hall-ah khelh chhunzawm leh a ni dawn a, semifinal lut tur a hriat kim ang. Kolasib Fighters, Zopa Goldsmith Chawnpui leh Chalkunga Memorial Taekwondo Club Hlimen Rollers-ten hmun ruak pahnih la awm chu an inchuh ang.
League vawi nga ṭheuh an khelh tur zinga match li an khel zo tawh. Armed Veng Warriors-in hnehna chang vekin point 12 an hmu a, hma an hruai. Champion lai Ramhlun Sporting Club Fighters-in point kua kawl bawkin a sang pahnih hian semifinal an lut tawh.
Vawi li an khelh tawhah Aizawl Taekwondo Academy Electric Veng Fighters an tlawm vek a, team tha paruk inel zinga hniam ber ni mekin khelh khat la nei mah se an tla fel tawh a ni.
Player lakluh nana sum seng tam ber Kolasib leh sum hmang tam ber pahnihna Chawnpui ten point ruk ve ve kawlin, an khelh tawhah vawi hnih tlawmin tum hnih an chak. Hlimenin tum khat hnehna changin vawi thum tlawm tawh mah se point thum kawlin beiseina an la nei.
Zanin Inkhel Tur
Chawnpui vs Hlimen
Kolasib vs Electric Veng
Armed Veng vs Ramhlun