India coach Luis Norton de Matos-a'n Mizo rawlthar pahnih a koh belh

FIFA U-17 World Cup-a India coach Luis Norton de Matos chu India Under 19 coach turin AIFF chuan a ruai zui a; AFC U-19 Qua­li­fiers khelh turah Under 17 World Cup-a a player-te a chhawm dawn a, squad tichak tur a koh belh zingah Mizo rawlthar pahnih an tel.

Edmund Lalrindika, Lunglei leh Lalawmpuia, Ramhlun South-te chu player koh 29 zingah an tel a, anni bakah hian World Cup khel zinga mi Lalengmawia a tel bawk. Heng player-te hian New Delhi-ah training an nei mek a, he ta ṭang hian an la inthlifim leh dawn a ni.

Team ngai

AIFF chuan youth team ṭha tak neih duhin ṭan a la mek a, Under 17 World Cup squad chu AIFF-ah contract ziahpuia dah khawm a, nakin zela India senior team thlenga kal thei tura duan a duh. Hei hi player tam zawkin ṭha ti mah se, AIFF contract-ah hian club danga chhuah theih lohnate a inziak tela sawi a ni a, World Cup player ṭhenkhat chuan AIFF-ah contract an la ziak duh lo.

Tun ṭumah hian India Under 19 team awm saa player chu telh an ni ta mang lo a, coach-in a player hriat chian sate hmangin AFC U-19 Qualifiers khelh a tum a, World Cup-a khelte kha a chhawm leh deuh vek dawn a, hmel thar tlemin an belh a ni.

India kalkawng

India U-19 National team hi Novem­ber-a Saudi Arabia-a AFC U-19 Qualifiers khel tur an ni a, hetah hian team ṭha tak tak - a thleng­tu Saudi Arabia, Yemen leh Tur­kmenistan nen Group D-ah an awm.

November 4-ah Saudi Arabia an tum ang a, November 6-ah Yemen nen inkhel lehin November 8-ah Turkmenistan an hmachhawn leh dawn a ni.

India team hian Delhi aṭangin October 25 hian Doha an pan ang a, Qatar U-19 National Team nen friendly match an khel ang a, chumi zawhah Saudi Arabia an pan ang.

India Squad :
GOALKEEPERS: Dheeraj Singh, Prabhsukhan Singh Gill, Mohammad Nawaz.
DEFENDERS: Boris Singh, Jitendra Singh, Anwar Ali, Sanjeev Stalin, Sahil Panwar, Deepak Tangri, Amal Das, Namgyal Bhutia, Asish Rai.
MIDFIELDERS: Suresh Singh, Ninthoinganba Meetei, Amarjit Singh, Abhijit Sarkar, Lalengmawia, Komal Thatal, Jeakson Singh, Nongdamba Naorem, Rahul Kannoly Praveen, Naorem Roshan Singh, Pranjal Bhumij, Abhishek Haldar, Princeton Rebello.
FORWARDS: Aniket Jadhav, Rahim Ali, Lalawmpuia, Edmund Lalrindika.