MotoGP champion tur Marquez?

Pathianni chawhma dar 10:30 hian MotoGP Australian Grand Prix tlan a ni dawn a, rider cham­pionship hma­hruaitu Marc Marquez chu nomawi chawi thei dinhmunah a ding mek.

Honda rider Marquez hian intlansiak vawi 15-ah point 244 hmuin amah hnaih bertu Andrea Dovizioso aiin point 11 in a sang fal zawk, intlansiak hmabak pathum chiah a awm tawh avangin a dinhmun a ṭha tawh hle.

MotoGP vawi thum champion tawh Marquez chuan, "Japanese GP kan tlan hma khan point 16-in hma ka hruai a, tunah chuan 11-ah a tlahniam leh tawh. Mi ṭhenkhatin ka rilru lakpen tumin champion tur angin min sawi fo a, a la ni ngawt lo. Chetsual theihna kawng tam tak a la awm a, fimkhur taka inelna ka hmachhawn a ngai dawn a ni," tiin a sawi.

Tunkar tawpa an intlansiakna tur Phillip Island Grand Prix Circuit hi kum 1956 a siam kha niin 4.445 km a thui a ni a, kawng kawi 12 awmin tuipui kama awm a nih avangin tlankawng nuam leh mawi tak a ni.

Season hmasa khan he hmunah hian Marquez hian pole position aṭangin bul ṭan mah se lap kuana lekah a chesual a, intlansiak a tlan tluan ve thei lo. Honda rider Marquez hi nimin khan practice-naah che ṭha lehin pakhatna a ni a, inelna takah fiahna a hma­chhawn ang.

Rider Championship Table
# Rider Team Points
1 Marc Marquez Honda 244
2 Andrea Dovizioso Ducati 233
3 Maverick Vinales Yamaha 203
4 Dani Pedrosa Honda 170
5 Valentino Rossi Yamaha 168
6 Johann Zarco Yamaha 125
7 Jorge Lorenzo Ducati 116
8 Danilo Petrucci Ducati 111
9 Cal Crutchlow Honda 92
10 Jonas Folger Yamaha 84