Man City-in Sane an ui?

Manchester City chuan kum khat daih chauh contract nei tawh Leroy Sane chu man tlawm deuha chhuahtir an ui a, a contract neih lai pawh hman zawhtir mai an duh zawk niin a lang.

Kum 24 mi Sane hi Bayern Munich chuan nipui bazar hmasa khan lakluh an lo tum tawh, German champion hian an la duh reng a, contract a neih rei tawh loh bakah hliam vangin tun season a khelh loh avangin a man a san tur angin a sang tawk thei dawn lo.

German international hian an ram club ṭha ber Bayern Munich zawm a duh nia ngaih a ni a, a contract neih lai a hmang zo a nih chuan man nei loin a duh lam club a zawm thei ang. City tan man neia hralh theih lai a ni a, chutihrualin a man phu tawk aia tlawma hralh ai chuan contract hman zawhtir a thlanawm zawk thei a ni.

Nikum August thlaa Community Shield an khelh ṭumin Sane hi a khup a hliam, tun season bikah chuan match a la khel lo. Man City manager Pep Guardiola-a'n squad player pawimawh a nih thu sawi mah se contract thar erawh a ziah hmel rih lo.

Schalke winger hlui hi March thla khan inkhel turin a inpeih leh tawh, mahse hri leng vanga Premier League an chawlh lailawk avangin a inlan rih lo; league an khelh chhunzawm a nih chuan Pep-a tan chhawr theih a ni ang.