Dinhmun inang lo Arsenal leh Everton
Europa League lamah Arsenal an la chak vek a, Everton erawhin chak ni hmel an la hmu lo thung. Premier League club pahnihte hi Pathianni zan dar 6:00 hian Goodison Park-ah an intawng ang.
Ningani zan khan Gunners hian khualmualah Serbian club Crvena Zvezda chu si khat faiin an hneh a, goal awm chhun hi hun tawp hma minute nga chiah a awm tawh tiha Olivier Giroud khung a ni.
Arsene Wenger-a nauten a zawna vawi thum an chakna ni turin an nghah rei a ngai hle, minute 80-naah defender Milan Rodic chu yellow card vawi hnih hmuh vangin hnawhchhuah a ni a, team ṭha zawk Arsenal lamin minute nga hnuah an chhawr ṭangkai nghal.
Midfielder Jack Wilshere leh Theo Walcott ten mawi taka ball an inpek kual hnuah French striker Giroud chuan mawi danglam takin a bin lut a, khualmualah point thum hlu tak an hlawh chhuak.
Chakna goal khungtu Giroud chuan, "Khatiang hunah kha chuan ball thunun theih a ni lo a, remchang sela chuan
ṭhiante pe tura insiamremna tur zawk a ni. Ka ṭhiante pek tur ka hmuh remchan tak mai lohah chuan ka theih ang tawka ṭhaa tih ka tum a, a goal hlauh kha ka vannei hle," tiin a sawi.
Wilshere a inpeih
Arsenal aṭanga inzir chhuak Jack Wilshere hi English midfielder beisei awm ber pawl a ni ṭhin. Mahse, hliam a nei ngun a, beisei angin khelmual chhungah hun a hmang tam lo - season hmasa phei kha chuan intuai hriam turin loan hmanga chhuahtir a ni.
Crvena Zvezda hmachhawn tur hian Wenger-a'n tun season Premier League lama a chhawr rim zingah chuan keeper Petr Cech chiah a khelhtir. Giroud, Wilshere leh Walcott te bak chu rawlthar rual tan khelhna hmun a siamsak.
Senior player tam zawk awm loh hlanin England midfielder Jack Wilshere chu khelmual chhunga hotu pa a ni a, Arsenal inkhel khaikhawmtu leh an goal nawr kawnga sulsutu pawimawh ber pakhat a ni. Kuminah Wenger-a'n league match la khelhtir miah lo mah se Europa League leh League Cup lama a inlan ṭum chuan player hmuhnawm leh ṭangkai a ni ziah.
Arsenal manager Arsene Wenger chuan, "First half-ah khan Jack kha a keah an pet sak a, thlak a ngai mai ang tih a hlauhawm hman hle. Mahse, minute 90 chhung chu harsatna nei loin a khel thei, tunah chuan Premier League khel thei tur a ni tawh," a ti. Wenger hian a midfielder hi nakkum FIFA World Cup a inlan phak tur chuan club dang zawn kher a ngaih loh thu a sawi tawh bawk, Wilshere tan kawng a inhanwg chho dawn niin a lang.
Leatgue a pawimawh
Arsenal-in Watford lakah an goal an venghim zo lo a, an tlawm haw - league hmahruaitu Manchester City nen an inthlauhna chu point kua zet a ni tawh. North London club hian champion an tum a nih chuan a thu ringawt ni loin a taka an insiamṭhat a ngai tawh takzet.
Wenger-a'n inelna zawng zawng ngai pawimawh mah se Premier League chu an dah san ber a nih thu a sawi tawh. Serbia-ah pawh hian an player manto ber Alexandre Lacazette bakah playermaker Mesut Ozil leh Alexis Sanchez te chu squad-ah pawh telh an ni lo. Pathianni zanah erawh Wenger hian a player neih ṭhat ber Goodison Park-ah a thawhchhuah pui ang.
Koeman a buai?
Everton manager Ronald Koeman chuan Lyon lakah 2-1 a an tlawm hnuah a dinhmun chu ngun taka endik zui a nih thu a sawi chhuak. Toffees hian point khat chiah an la hmuh avangin Group E-ah a mawngphah an ni a, tun hnai inelna hrang hrangah a zawnin match li chhung chu chak ni hmel an hmu tawh lo.
A hma hun zawhna chhangin Koeman chuan, "Ka hma hun hi ka kutah ni loin board kutah a awm, he club enkawl tura mi ṭha leh tling ka nih loh chuan min hrilh mai ang," tiin English club a enkawl chhunzawm zel dawn leh dawn loh a chiang tawh rih lo.
Everton hian nipui bazarah sum tam tak sengin Gylfi Sigurdsson, Ajax playmaker Davy Klaassen te bakah an fapa tlanbo Wayne Rooney an la let a, player thar lakkhawm nan pound maktaduai 100 chuang an hmang - tunah hian league table-ah 16-na dinhmun luahtu an ni. Dutch manager hian a hna ngai thawh chhunzawm zel a duh a nih chuan Pathianni zanah Arsenal lakah hnehna chan a pawimawh khawp ang.
Inkhel dang
Ningani zan Europa League group match inkhel dangah Hoffenheim chuan Turkish club Istanbul Basaksehir chu 3-1 in an hneh. German club, Lammuala inkhel tawh Hoffenheim hian European competition-ah match nga an khelh tawh aṭangin a vawi khat nan hnehna an chang ve chiah.
Liverpool striker hlui Mario Balotelli goal hmangin Ligue 1 club Nice chuan Lazio lakah hma hruai mah se, Italian club lam hian Felipe Caicedo goal hnih bakah Sergej Milinkovic-Savic goal hmangin 3-1 in an lehthal.
Europa League Group Stage
Ningani zan Inkhel Results
Astana 4 - 0 Maccabi Tel Aviv
Lugano 3 - 2 Viktoria Plzen
Hapoel Be'er Sheva 1 - 2 FCSB
Ostersunds FK 2 - 2 Athletic Club
Zorya 2 - 1 Hertha BSC
BATE 1 - 0 Cologne
Crvena Zvezda 0 - 1 Arsenal
Konyaspor 0 - 2 Salzburg
Marseille 2 - 1 Vitoria Guimaraes
Nice 1 - 3 Lazio
Zulte-Waregem 1 - 1 Vitesse
Zenit 3 - 1 Rosenborg
Vardar 0 - 6 Real Sociedad
Villarreal 2 - 2 Slavia Praha
Skenderbeu Korce 0 - 0 Partizan
Dynamo Kiev 2 - 2 Young Boys
Milan 0 - 0 AEK Athens
Austria Wien 1 - 3 Rijeka
Everton 1 - 2 Lyon
Atalanta 3 - 1 Apollon
Sporting Braga 0 - 2 Ludogorets
Hoffenheim 3 - 1 Istanbul Basaksehir
Sheriff 1 - 1 Lokomotiv Moskva
Zlin 1 - 1 København