Kyrgios leh Berdych tan season a tawp

Nick Kyrgios leh Tomas Berdych te chuan hliam vangin tun season chhungin tennis an khel thei tawh dawn lo. Player pahnihte hian season thar atan inbuatsaihna an neih chhunzawm tur thu an sawi.

Australian star Kyrgios hi a khel bawr na vangin a chawl mek a, China Open final-a Rafael Nadal a hneh loh hnuah a la inkhel leh thei rih lo a ni.

World number 20 Kyrgios chuan, "Tun season chhung chu ka inkhel tawh rih lo ang, inelna ṭhenkhatah chuan hliam tenau nei chungin ka inlan a, kaṭhat pui loh mai bakah ka chhiatpui zawk. Nakkumah kan ramah season bul ṭan ngei ka duh a, hard court tournament hmachhawn thei turin inbuatsaihna ka nei reng tho ang," tiin a sawi.

World number 18 Tomas Berdych pawhin a hnungzâng na vanga a chawlh tur thu sawiin, "Wimbledon hnuah ka hnungzâng na hi a la reh fel lo, ka doctor thurawn angin ka chawlh rih dawna ni," tiin a sawi.

Andy Murray, Novak Djokovic, Stan Wawrinka leh Kei Nishikori te chu hliam vang vekin tun season chhungin an hmel kan hmu dawn tawh lo. World number 1 Nadal pawh chawlh a duh rih avangin karleha khelh tur Swiss Indoors Basel tournament aṭangin a inhnukdawk a ni.