FIFA U17 World Cup ; Quarterfinal khelh ṭan a ni dawn

FIFA Under 17 World Cup quar­terfinal chu zanin hian match hnih khelh a ni ang a, Pathianni zanah inkhel pahnih dang a awm leh bawk ang. Kum bithliah inelna a nih avangin team ṭha teh nan ram hming en ngawt theih a ni lo a, chak tur rin thiam a harsa bawk.

Mali leh Ghana ten quarterfinal match hmasa ber an khel dawn a, Indira Gandhi Athletic Stadium, Guwahati-ah tlai 5:00 hian an khel ang. Zan dar 8:00-ah United States leh England ten Fatorda Stadium, Margao-ah an inkhel chhunzawm leh bawk dawn.

Pathianni tlai dar 5:00 hian Jawaharlal Nehru Stadium, Kochi-ah Spain leh Iran an inkhel ang a, match hnuhnung ber khel turin Germany leh Brazil te zan dar 8:00 hian Salt Lake Stadium, Kolkata-ah an inhma-chhawn ang.

Mali Vs Ghana

Kum bithliah inelnaah African ramte an che ṭha ṭhin a, Ghana hi vawi hnih champion tawh niin Mali pawh hi inelna hnuhnung bera final lut thei an ni. Quarterfinal lut turin Ghana hian harsatna nei loin Niger 2-0 in an hneh a, Mali pawhin Iraq 5-1 zetin an sawp.

Mali hneh lotu Iraq coach Qahtan Chither chuan, "Mali hian player ṭha tak chu an nei tih kan hria a, amaherawhchu an pian zia leh an chakna te thlirin pawm a harsa ṭhin a ni. African player-te leh ram dang player-te khelh dan hmangah danglamna nasa tak a awm a, a chang chuan Under 17 team ni loin Under 23 team ni hialin an lang," tiin kum dik lo an tam a rin thu a sawi.

Hetihlai hian Mali coach Jonas Komla chuan result pawm thiam mai tur tihin a chhang let. Mali hian quarterfinal-ah team ṭha an hmachhawn dawn a, an khingpui tur hi anmahni ang bawka chak Ghana an ni. Mali striker Lassana N’Diaye chuan match li lekah goal nga khung tawhin top scorer a ni mek a, tlarhnung phui ṭha zawk Ghana hmaah fiahin a awm ang. Black Starlets (Ghana sawina) hi chak tura rinkai zawk an ni a, captain Eric Ayiah chuan goal thum khung tawh team hruaitu a ni.

United States Vs England

United States hian kum 1999 khan semifinal an thleng tawh a, England erawh zanina hnehna an chang a nih chuan a vawi khat nan semifinal an thleng ve chauh ang.

India-in an match hmasa bera an hneh loh United States hian quarterfinal thleng turin group B-a khingpuite hneh vektu Paraguay 5-0 in an sawp thei a, hemi ṭuma hattrick siamtu Timothy Weah-a'n ngaihven a hlawh ang. United States striker Tim hi FIFA World Player of the Year leh Ballon d'Or pawh lo dawng tawh George Weah fapa a ni.

England-in tun hnaiah kum bithliah inelnaah nasa takin hma a sawn a, kumin FIFA U20 World Cup leh UEFA European U19 C'ship-ah an champion ve ve a, UEFA European U17 C'ship-ah final an thleng bawk. Amaherawhchu, Euro U17-a best player Jadon Sancho chu group stage khelh zawhah a club khelhna Borussia Dortmund-in an ko let a, Sancho tel loin Japan penalty shottout-ah an hneh hram. Coach Steve Cooper-a hote hian zanin hian United States hmaah fiahna harsa zawk an paltlang a ṭul ang.

Spain Vs Iran

Spain-in football khawvel thunun lai nei mah se Under 17 World Cup-ah erawh nomawi an la chawi lo a, pahnihna vawi thum an ni tawh thung. An khingpui tur Iran hian sulhnu chhui let tur ṭha an nei lo a, inelna neih mekah erawh record nei ṭha ber zinga mi niin Germany 4-0 zeta sawp thei an ni.

UEFA European U17 C'ship champion hian group stage-ah Brazil an hneh lo a, amaherawhchu quarterfinal thleng tura France an hneh theih bakah Barcelona leh Real Madrid a inzir mek player pakua an nei a, rinkai zawk tur an ni.

Iran hian inelna vawi li an hmachhawn tawh a, tun hi quarterfinal an thlen vawi khatna a ni a, match li khelh tawhah Germany (4-0), Guinea (3-1), Costa Rica (3-0) leh Mexico (2-1) te an hmachhawn chungin hun pangngaiah an an la chak vek. Spain an hmachhawn hunah erawh goal hnih khung tawh forward Younes Delfi chu Mexico nen ṭul lo taka yellow card a hmuh avangin a inlan thei dawn lo a, hei vang hian an khelh dan tur an duan uluk lehzual a ṭul ang.

Germany Vs Brazil

Football inelnaa Germany leh Brazil an inhmachhawn tawh chuan thlir dan a dang nghal a, en a châkawm nghal bawk. Kum thum liam ta khan Die Mannschaft chuan Selecao (senior) chu an mual Belo Horizonte-ah World Cup semifinal-ah an mualpho tawh a, tun ṭuma Brazil-in hnehna an chan theih chuan phuba lakna chi khat a ni thei ang.

Vawi thum champion tawh Brazil-in an match hmasa berah Spain (2-1) an hneh nghal a, hemi ṭuma goal an chhuah bakah hi North Korea (2-0), Niger (2-0) leh Honduras (3-0) goal an la chhuah leh lo a, an chak vek bawk. Sao Paulo FC forward Brenner leh Flamengo forward Lincoln ten goal thum ve ve an khung tawh a, an tlarhnung a phui bawk avangin Germany aia dah san zawk an ni.

Germany-in an match hmasa berah Costa Rica 2-1 in an hneh hram a, Iran lakah 0-4 in an mualpho zui a, knockout stage thleng turin Guinea 3-1 in hneh leh mah se Die Mannschaft hian group stage-ah beisei an la pha lo. Amaherawhchu, Germnany hian Colombia 4-0 in last 16-ah an sawp a, Brazil hmachhawn turin an phur khawp ang. Hamburger SV forward feet ruk leh inches hnih zeta sang Jann-Fiete Arp chuan goal li a khung tawh a, thlir bik theih tur player a ni.