Australian Open 2021 a chiang lo

Tennis Australia chuan nakkum January thlaa neih tur Australian Open 2021 chu a hunbi pangngaiah an nei thei ngei dawn em tih a chiang lo tih an sawi a, a hun sawn leh ṭhulh thu erawh sawi a la ni rih lo ang.

Covid-19 vangin ram hrang hrang an inkharkhip a, infiamna khawvel a chawl. Tennis pawh July 13 hma lam chuan khelh a ni dawn lo, chawlh hun chhung hi pawhsei theih a la ni bawk.

Australian Open 2021 hi Melbourne khawpuiah January 18-31 chhunga neih tur a ni. Ram hrang hrangah hri lengin zual lai a nei a, Australia ramah hri hi reh loa a darh zel a nih chuan tennis inelna hi a nghawng buai dawn.

Tennis Australia chuan thuchhuah siamin, "Khawvel hun tawn kan hre vek a, keini pawh nakkuma inelna kan neih tur atan kan hlauthawng ru hle tih chu zep tur a awm lo. Tournament kan neih theihna tur a neih erawh chuan kan tih theih zawng zawng kan ti ang," tiin a sawi.

Kumin August thla tawp aṭanga September thlatir lam hian US Open chu New York khawpuiah khelh a ni dawn. United States Tennis Association chuan June thla laihawl hian tournament chungchanga an thutlukna an puang ang.