Liverpool khelmualah City
July 30, 2022 khan season bul ṭan nan Community Shield khelh a ni a, Liverpool chuan 3-1 a Manchester City hnehin, nomawi nen season bul an ṭan - Reds fan-te an sapatal a, season ṭan tak tak hun an nghakhlel.
Mahse maw, rei lotêah thawnthu chu thlak danglamin a awm - Premier League match kua an khelh meuh chuan City-in table-ah pahnihna dinhmun an luah a, Liverpool chu 10-na an ni.
City-in tlawm an la nei lo a, Liverpool erawh match riat khelh tawhah vawi hnih chiah an la chak a, season an hmang chhe takzet.
Mahse, Reds hian an hmingchhiatna thai reh a, beiseina thar insiam turin hun ṭha an nei - Pathianni zan dar 9:00-ah City an mikhual dawn a, an tlawm hlauh erawh chuan an buaina chu belhchhahin a awm ang.
An inpeih e
Pep Guardiola leh Jurgen Klopp te inelna hi football chanchin sawi a nih chhunga sawi tel ziah tur khawpa ngaihnawm a ni a, coach pahnih hi hriat pawh an inhrechiang hle - an intawng leh dawn ta.
City hian Reds an hmachhawn hmaa an match hnuhnung berah club lian lo Copenhagen chu 0-0 in an inhnehtawkpui a, mahse, Pep-a'n Liverpool nena an inkhel tur a ngaihtuah tel avangin Ruben Dias, Bernardo Silva, Phil Foden leh Erling Haaland te chu bench-ah a dah.
Klopp a bang bik lo - German coach hian City mikhual turin a ngaihtuahna a seng lawk a, Rangers an sawp zanah Thiago Alcantara, Mohamed Salah leh Diogo Jota te chu bench aṭang vekin a luhtir.
Coach pahnihin an neih ṭhat ber nen inhmachhawn an duh tih a lang chiang a, inkhel a hmuhnawm dawn. Mahse, Liverpool-in hliam vangin Trent Alexander-Arnold, Joel Matip leh Luis Diaz an chhawr thei dawn lo a, dam se bul ṭan tura ngaih vek an ni.
Chona phurawm
Klopp-a'n a hmaa chona inchhawp a hrechiang a, German coach chuan, "City hmachhawn dawn chuan rilru zawng zawng pek a ngai a, football-a i hriat zawng zawng i thehchhuah a ngai. He game atana inbuatsaih hi a nuam ka ti a, football-a chona phurawm ber a ni," a ti a, Pep-a City a dah sang hle.
Klopp hian tun hnaiah a hman rim 4-3-3 hnuchhawnin 4-4-2 a hmang a, tlarhmaa a player neih ṭhatte a chhawp chhuak vek zel. Zaninah pawh German coach hian tun season-a goal riat khung tawh Salah leh Roberto Firmino, Jota leh Darwin Nunez te bul a rawn ṭantir vek a nih pawhin a mak lo ang.
Klopp chuan, "Mahni muala khel tur kan ni - City hi tun dinhmunah khawvela team ṭha ber ni mah se Anfield-a fan-ten min pui thei a ni tih hre chungin kan theihtawp kan chhuah dawn a, hman ṭangkai kan tum bawk ang," a ti.
Liverpool tana thu lawmawm chu City an hmachhawn hma lawka Salah-a'n hattrick a siam chu a ni a, Firmino a 'form' a, Nunez-a'n goal a khung ṭan bawk.
Haaland vs Nunez
Community Shield-a Nunez-a'n Reds chakna nemnghehna goal a khung lai khan Haaland-a'n awlsam taka khung turah bar a tihper thung - City-in Haaland an lei fuh lo tia sawi a ni a, Nunez-a'n fak a hlawh thung.
Mahse, team pahnih an intawn leh dawn meuh chuan Haaland-a'n goal 20 a khung tawh a, Nunez-a'n goal li - an inthlau ta hle. Klopp chuan, "Haaland hi engtia dan chi nge ka hre lo - a khung zel tho! Tharum a ngah a, a thiam a, ball awmna a hre em em bawk.
"City-ah hian a goal khung tur siamsak turin khawvela ṭha ber ber De Bruyne, Mahrez, Foden leh Bernardo Silva a nei bawk. Haaland ringawt ngaihtuah ila, world class player dang tan hmun awl kan siamsak dawn bawk si," a ti!
Klopp-a sawi angin Reds tan Haaland ringawt ven a rem lo - Kevin De Bruyne, Foden, Silva leh Mahrez te hi khingpui team vawi khat chetsual chhawr turin an ṭha tawk.
A harsa dawn
Tun season-ah Liverpool leh City an inthlau a, mahse, Pep-a'n an elpui team a dah hniam duh lo. City boss chuan, "Table-a kan dinhmun avangin Liverpool ka hmuh dan a danglam lo.
"Premier League nomawi chawi tura kan elpui ber an la ni reng. Khelmualah game chu chinfel a ni dawn a, table hmanga chinfel tur a ni lo. Liverpool theihna ka hria a, anni pawhin kan theihna an hria.
"League match thum chauh khelh tur awm tawh se, Liverpool tana a harsat tawh thu ka sawi thei ang. Mahse, hun a la tam a, a kar lakah World Cup khelh a nih dawn bawk avangin eng pawh thleng thei a ni," a ti a, a ṭawng uang duh lo.
Liverpool hian point 14-in hmahruaitu Arsenal an phak lo mek a, Champions League-ah Rangers chu 7-1 ngawtin sawp mah se, an league match hnuhnung berah 3-2 in Arsenal an ngam lo tih hriat tel a ṭha.