Chhingcows hmaah Bethlehem fiahna

Mizoram Premier League kaithar FC Bethlehemin game hmuhnawm tak an khel ṭhin a, amaherawhchu a tawp an khar ṭhat ṭhin loh avangin point li hmuin table mawngphahah an awm mek. Zanin dar 7:00 hian RG Stadium-ah coach Victor Lalbiakmawia enkawl Bethlehem hi Chhinga Veng hmaah fiahin an awm ang.

Zote Honda MPL9 match ruk khelh tawhah Bethlehem hian goal 13 an chhuah a, goal chhuah tam ber ni mah se goal 10 an khung avangin anmahni aia goal difference chhia hi team pahnih an la awm pha tho. Bethlehem forward Lalbiakdika leh Lalruatpuia ten goal hnih ve ve khungin goal khung tam zinga mi an ni a, an goal bawh na hi an inchhuanna a ni.

Chutihrualin Chhinga Veng tlarhnung hi a phui ṭha a, match ruk an khelhah ṭum li an cleansheet. Amaherawhchu, Chhingcows hian Khawzawla an inkhelh ṭumin goal hnih an hum zo lo a, point hnih an hloh phah. Goalkeeper RS Lallawmzuala'n a club career ṭanna club lakah a cleansheet record tih ṭhat a tum dawn a, Lawma hian a tum tihlawhtling turin a hmaa awm defender-te puihna a mamawh ang.

Chhinga Veng coach Anand Gurung chuan, "Bethlehem hi kan khingpui tur an nih avangin Khawzawlah pawh khan uluk takin kan thlir a, an khelh dante kan zir chiang. An goal bawh a na a, kan fimkhur a ṭul dawn. Chutihrualin phase 1 bika match hnuhnung ber a ni a, table-a dinhmun ṭha zawka kan awm theih nan chak ngei kan duh," tiin Vanglaini a hrilh.

Table aṭanga thlir chuan Chhinga Veng dinhmun a ṭha a, amaherawhchu Inrinni zana inkhel tur an nih avangin fans nei ṭha Bethlehemin au phur tur an nei ṭha dawn. RG Stadium-ah kawr var aiin kawr pawl a tam tura ngaih a ni a, khelmualah erawh chak tur hriatthiam a har viau thung.

Kartawpah MPL9
October 15, Inrinni
Chawnpui FC 4:00 PM Electric Veng FC
Chhinga Veng FC 7:00 PM FC Bethlehem