Chawnpui khingpui tur Electric Veng

Zote Honda MPL9-ah vawiin tlai dar 4:00 hian Chawnpui FC leh Electric Veng FC te an inkhel dawn a, table thlir chuan inchhuang tur bik an awm lo. Electric Veng hian MPL hnuhnung ber khan final hial thleng mah se tunah erawh table mawngphahah an awm a, an khingpui tur Chawnpui enkawltu hi an coach hlui Lalsangzuala Hmar a ni.

Coach Sanga hian Khawzawlah a club hlui Chanmari FC chungah zahngaihna a lantir lo a, point thum hlu tak a hlawh chhuak. MPL round 7-ah khan tawnhriat nei ṭha MC Malsawmzuala'n penalty leh freekick aṭangin goal pawimawh a khung a, midfield-ah tawnhriat nei ṭha dang David Lalrinmuana a ṭangkai viau bawk.

Chawnpui FC-ah hian coach Sanga chauhin tawnhriat a nei ṭha lo a, player-ah pawh rawlthar player-te thlawp turin tawnhriat nei ṭha player an ṭhahnem. Electric Veng erawh season liam ta angin an budget a sang tawh lo a, an squad chhah tawk lohna a lang leh ṭhin.

Chutihrualin EFC hian starting eleven-a khel tur player ṭha tak an nei a, an khelh ṭhat niah chuan eng team tan pawh harsatna siam thei an ni. An khelh tawh chin aṭanga a lan dan chuan Chawnpui hi Electric Veng tiatpui a ni a, vawiin inkhel tur pawh hi semifinal khel tur zawnna a la nih theih rualin relegation battle ti ila a fuh zawk ang.