Chak dan hria Arsenal

Arsenal season a kal fuh laklawh, an khelh ṭhat tawk loh zanah pawh chak dan an hre tlat. Bukayo Saka-a vanneih goal hmangin Gunners hian Bodo/Glimt 1-0 in an hneh a, point thum hlu tak hlawh chhuakin Europa League group A hmahruaitu an ni.

Mikel Arteta-a'n a player ṭha tam zawk a hahchawlhtir a, striker ṭha Gabriel Jesus phei chu squad-ah pawh a awm lo. Chutihrualin Europa League group hmahraitu nih a pawimawh a, chetsual palha lut turin squad-ah senior player a ṭhuttir.

Norweigian club Bodo/Glimt khelmualah phul tak tak phah a ni ve lo a, phul lem (artificial turf) phah a nih avangin ball a kal chakin a nal bawk. Second half-ah Gunners an talbuai phah deuh, mahse an goal an venghim tluan thei ta tho.

Gunners manager Arteta chuan, "Hma-sawnna tur kan la ngahzia chu second half kan khelh danah khan a hriat, chutihrualin ka naute boruak tur pawh ka hriatthiampui khawp mai. Tunah chuan Leeds United kan ngaihtuah tawh ang," a ti.

Premier League hmahruaitu Arsenal hian Pathianni zan dar 6:30-ah Leeds United an lenchilh dawn. Champion lai leh pahnihna ni mek Manchester City nen an inthlauhna point khat chauh a ni a, hmahruai zel an duh a nih chuan point hloh a thiang lo.