El Clasico - Real vs Barca - a her chhuak leh ta!

European football-a team inhal ber pawl, hlawhtlin duha thi leh thau pawlha bei ṭhin, inchhuk en tum reng renga hmanhlel ṭhin club pahnih chu kartawp La Liga match-ah an intawng leh dawn ta - Pathianni zan dar 7:45-ah Real Madrid chuan Barcelona an mikhual dawn a, boruak a san loh ring suh.

Team pahnih hian La Liga match riat khelh tawhah tlawm an la nei lo ve ve a, vawi sarih ve ve chakin, vawi khat draw an nei. Goal difference ṭhat vang chauhin Barca-in hma an hruai a, zaninah Real-in hmahruaitu nih duhin Barca lo hneh an tum dawn - Santiago Bernabeu-ah an intawng dawn tih nghilh lo la!

Italian coach ropui Carlo Ancelotti enkawlna hnuaiah Real an vul mek a, La Liga champion lai an ni - Barca erawh an player ropui ṭhin, coach ni ta Xavi hoa insiamrem tum mek an ni a, inkhel a hmuhnawm loh ring suh.

Barca forward Raphinha chuan, "Clásico meuh khel tur chu zamna a awm ve deuh a, mahse, ka ngaihtuahna hi a fim a ni. Hmahruaitu kan ni a, fimkhur tur an awm a nih chuan Real an ni ang - kan inringtawk a, chak tumin kan tih theih zawng zawng kan ti ang," a ti!

Dinthar lehna
King Carlo hoin Real hian season hmasa khan La Liga leh Champions League nomawi an chawi a, player ṭhenkhat kumin uai thlak lam a pan tawh avangin indinthar leh an ngai tih erawh an hai bik lo.

Real hlawhtlin nana player pawimawh Casemiro chu man man taka hralh theih a nih laiin Manchester United lamah an kaltir a, Aurélien Tchouaméni-a'n a hmun ruak a hnawh khat hneh hle - tlarhnung a pui ṭha a, Casemiro aiin goal nawr kawngah a ṭangkai zawk em ni chu aw, tih tur a ni bawk.

Kum 32 mi Toni Kross a la rintlak reng a, Luka Modric hi kum 37 ni tawh mah se a thiam a la theihnghilh lo a, bench aṭanga lut turin Eduardo Camavinga a la awm cheu bawk - Real midfield hi buaipui tham khawpa ṭha an ni.

Mahse, Barca hian kum 18 mi Gavi leh kum 19 mi Pedri te midfield-ah an nei tih hriat a ṭha a, Sergio Busquets leh Frenkie de Jong an la awm bawk avangin midfield-a team pahnih inel tur hi inkhel en châkawmna belhchhahtu a ni.

Benzema vs Lewy
Thawhṭanni zanah Ballon d'Or sem a ni dawn a, season hmasaa match 46-a goal 44 khungtu Karim Benzema chu dawng tura ngaih vek a ni. Mahse, tun season-ah erawh French striker hian hliam vangin beisei a phak lo a, match kuaah goal li chiah a khung.

Real-in tun thlatira 1-1 a Osasuna an inhnehtawkpui kha an chak zawh loh hmasa ber a ni a, Benzema-a'n penalty a hlah. Hemi hnu hian Real-in Champions League-ah Shakhtar Donetsk chu 2-1 in an hneh a, Benzema-a'n goal a khung lo a, Getafe (1-0) lakah hahchawlhtir a ni zui.

Madrid khaw club hian Thawhlehni zan khan Shakhtar an tawng leh a, Benzema khel mah se hun tawp dawna Antonio Rudiger goal hmangin an chak hram - zaninah Barca an hmachhawn dawn a, chetsual a thiang tawh lo.

Barca hian Robert Lewandowski an nei a, Bayern Munich-a awm laia Ballon d'Or dawng lo striker-in Catalan club a zawm chhan langsar tak chu Ballon d'Or dawn a duh vang niin an sawi - chutiang tur chuan El Clasico ang match ropuia a chet ṭhat a ṭul.

Thih leh dam
Barca-in Champions League-ah beisei an phak lo a, group stage-a tla thei dinhmunah an ding mek. Coach Xavi phei chuan, "Champions League hi kan tan a nunrawng em a ni," tiin a sawi hial a, beiseina an nei tlem hle. Hei vang hian Barca-in thih thain La Liga nomawi hmang tala an hmai bal phih fai an duh ang tih a chiang a, club share ṭhenkhat hralh chunga nipui transfer-a euro maktaduai 150 chuang seng club tan El Clasico-a tlawm a thiang lo.

Barca hian tun season La Liga-ah goal 20 khungin goal khat chiah an la chhuah a, Champions League-ah erawh match li aṭangin goal riat zet an chhuah tawh thung - Inter nen 3-3 an inhnehtawk ṭuma an tlarhnung khelh dan en phei chuan, Real lenchilh hi a châkawm lo ang.

Mahse, Barca tan international break-a inhliam Jules Kounde chuan training a zawm leh tawh a, French centre back awmin an tlarhnung a nghet sawt ang - tlarhmaah chuan tun season-a match 12-a goal 14 khungtu Lewy, Raphinha leh Ousmane Dembélé te an awm a, thlaphanna tur a awm lo.

Barcelona hian Canadian rapper Drake-a OVO owl logo chu an club jersey hmaah an tarlang dawn a, hei hi an thawhpui Spotify platform-a Drake hi tluklehdingawn 50 stream-tu nei hmasa ber a nih vang a ni.