Man United mikhual tur Newcastle

Erik Ten Hag-a kaihhruai Manchester United-in Europa League-a Omomoia Nicosia an hneh hram hnuah October 16, Pathianni zan dar 6:30 hian Newcastle United an mikhual dawn.

Ningani zan inkhelah Ten Hag-a'n kartawpa Magpies hmachhawn tur an nichungin sa huai a ser a, Cypriot club Omomoia lakah Cristiano Ronaldo, Marcus Rashford leh Antony ten an khung thei lo.

Omomoia keeper Francis Uzoho a che ṭha a, amaherawhchu Old Trafford-ah Nigerian keeper hi a ṭang tluan thei ta bik lo. Hun pek belh minute thumnaah Scott McTominay-a'n goal pawimawh a khung. Inkhel dangah Real Sociedad-in Sheriff Tiraspol 3-0 in an hneh a, Man United tan group hmahruaitu ni turin Sheriff leh Sociedad te hi an hneh a ṭul dawn.

October thlaah Man United fixtures a hautak a, Newcastle an hmachhawn zawh hian Tottenham leh Chelsea nen an inkhel lehnghal ang. Ten Hag-a'n fing takin player a thlan thiam a ṭul dawn a, chutihrualin Pathianni zana an khingpui tur Magpies hi Europe inelnaa an tel ve loh bakah an match hnuhnung pahnihah Fulham (4-1) leh Brentford (5-1) an sawp tih an hriat a ṭha bawk.