'Hand of God' ball man a to dawn

FIFA World Cup 1986-ah Diego Maradona hoin Argentina-in World Cup nomawi an chawi a, khawvelin an sawizui erawh quarterfinal-a La Albiceleste-in England an hneh dan a ni.

June 22, 1986 khan Estadio Azteca, Mexico City-ah Argentina-in Maradona goal ropui hmangin Three Lions 2-1 in an hneh. Footballer ropui ber ti hiala an sawizui Maradona-a'n minute 51-naah a hnek goal a, minute 56-naah player panga bumin goal ropui a khung leh bawk.

Maradona goal hmasa zawk hi 'Hand of God' hming an vuah a, he inkhela ball hi referee Ali Bin Nasser-a'n (Tunisia) a chang. Inelnaa ball hman hi 'azteca' a ni a, minute 90 chhung an hmang. Bin Nasser chuan, "Football history-ah he ball hian hmun pawimawh a chang a, tun hi khawvel hmaa chhawp chhuahna hun ṭha a ni," tiin a sawi.

Kumin World Cup pualin November 16 hian ball hi hralh a ni dawn a, tun thla October 28 aṭangin lilamna hi an kalpui ang. Ball manah hian pound maktaduai 2.5-3 hmuh chhuah beisei a ni.

Argentina leh England inkhelh ṭuma Maradona kawr hak chu kumin May thla khan pound maktaduai 7.4 ($9.3m) in an lalilam tawh. August thla khan Mickey Mantle baseball card chu pound maktaduai 10.3 ($12.6m) in hralh a ni a, 'sporting memorabilia' hralhna man to ber a ni.

Kawr bika manto ber chu Michael Jordan-a jersey hlui a ni. Kumin September thla khan 1998 NBA finals-a Jordan-a jersey hak chu pound maktaduai 8.7 (10.1m) in an hralh a, Maradona kawr record a khum leh bawk.