Hyderabad-in NorthEast an sawp

Tun season ISL-a an match hmasa berah sawisel theih takin NorthEast United an tlawm a, Hyderabad lakah erawh goal thum zet an chhuah avangin chhuanlam tur a awm tawh lo - Ningani zan khan 3-0 in an tlawm.

Hyderabad-in minute 13-na aṭangin goal an khung ṭan a, Mohammad Yasir siamsak chu Bartholomew Ogbeche chuan harsatna nei loin goal-ah a chantir - goal dang lut loin chawlhlawk hman a ni.

Indira Gandhi Athletic Stadium, Guwahati-a inkhelah Highlander fan-ten an team 'comeback' lai hmuh an beisei a, an thil hmuh erawh an lama goal hnih lut lai a ni thung.

Second half-ah Halicharan Narzary leh Borja Herrera ten Hyderabad tan goal khat ve ve an khung leh a, NorthEast United tan thawh leh ngaihna a awm tawh lo - Assam tlangval Hali hian tun season match hnih aṭangin goal hnih a khung tling ta der.

Hyderabad neitu Varun Tripuraneni-a'n Vanglaini hnenah Mizo rawltharten season tharah hmun an chan tur thu a lo sawi tawh a, Highlander nena an inkhelah pawh Lalchungnunga Chhangte leh Mark Zothanpuia te chu hun tawp lamah bench aṭanga luhtir an ni.

NorthEast United tan midfielder Emanuel Lalchhan-chhuaha'n bul a ṭan a, minute 56-naa luhtir Rochharzela'n 1-0 a nih laiin Matt Derbyshire tan a siamsak a, mahse, Nottingham Forest striker hlui hian a chance neih goal-ah a chantir thei lo.

Highlander hi coach Marco Balbul chuan Bengaluru laka 1-0 a an tlawm ṭuma red card pek a nih avangin a ho thei lo a, assistant coach Paul Groves hoin an inlan a ni.

October 13, Ningani Zan
NorthEast United 0 - 3 Hyderabad FC
HYD: Bartholomew Ogbeche 13'; Halicharan Narzary 69'; Borja Herrera 73'

Zanin Inkhel Tur
Mumbai City 7:30 PM Odisha FC

October 16, Pathianni Zan
Kerala Blasters 7:30 PM ATK Mohun Bagan