Bundesliga-ah table chunglam inkhel dawn

October 16, Pathianni zan hian Bundesliga table chunglam palite an inkhel kual dawn. Zan dar 9:00-ah hmahruaitu Union Berlin-in palinaa awm Borussia Dortmund an mikhual ang a, zan dar 11:00-ah pathumna Bayern Munich-in pahnihna Freiburg an mikhual ve bawk ang. Bayern leh Dortmund hi champion tura rinkai ni mah se Union Berlin an phak lohna hi point li a nih avangin tunkar tawpah chuan table chung berah an la awm thei dawn lo.

Union Berlin hian season ṭha tak an hmang a, eng ang chiaha ṭha nge an ni tih fiahin an awm chho mek. Berlin tan hian Dutch winger Sheraldo Becker chuan inelna hrang hrangah goal ruk a khung tawh a, Dortmund laka point hlawhchhuak tur pawhin a chet ṭhat a pawimawh a ang. Dortmund lamah Jude Bellingham-a'n UCL match li khelh tawhah goal a la khung vek a, Erling Haaland awm loh hnuah Dortmund-in 'star' an zawng a, English midfielder Bellingham boruak hi a lian hle.

Bayern Munich pawh international break hnuah an insiamṭha a, amaherawhchu tlarhnung hnawh phui an la thiam lo. League match hnuhnung berah Dortmund lakah goal hnih an chhuah a, 2-2 in an inhnehtawk.

Victoria Plzen lakah Bayern hian goal li ngawt khung mah se goal hnih tho an chhuah. Freiburg an hmachhawn hunah hian Covid-19 vangin Jamala Musiala dinhmun a chiang lo a, Manuel Neuer pawh hliam vangin inlan lo thei dinhmunah a ding bawk.