West Ham tlinna Bowen-a goal

Jarrod Bowen chuan West Ham tan goal pawimawh a khung. English forward goal hmangin Hammers hian Anderlecht chu 2-1 in an hneh a, khelh hmabak pahnih nei chungin Europa Conference League-ah knockout stage an lut.

West Ham tan Bowen hian European football bikah goal ruk a khung ta a, club tana goal khung hnem Johnny Byrne leh David Cross te a nih rual ta chiah, khelh hmabak an neih dan thlir chuan record thar a siam ngei ang.

Hammers manager David Moyes chuan, "Khelh hmabak kan la nei, group match bakah knockout round pawh kan khel dawn, tun anga a khelh reng chuan goal pawh a la khung belh ngei ka ring. Season hmasa lama a khelh dan ang kha a nei chho leh mek," tiin a sawi.

Premier League club tan hian Bowen bakah Said Benraham chuan goal khat a khung, mikhual Anderlecht tana Sebastiano Esposito-a penalty chhuih luhin awmzia a nei phak tawh lo.

West Ham hian Pathianni zan dar 6:30 hian, league match khel turin Southampton an lenchilh leh nghal ang.