Hmasawn ka ngai takzet - Quartararo

MotoGP hmahruaitu Fabio Quartararo chuan insiamṭhat a ngaih thu a sawi a, a chesual leh zauh a nih chuan a elpui Francesco Bagnaia lakah hmahruaitu a nihna chu chân mai thei dinhmunah a ding, a hmahruaina a nghet lo hle.

Yamaha rider Quartararo hian point 219 a nei tawh a, pahnihna Bagnaia aia a sanna chu point hnih chauh a ni. Pathianni zing dar 8:30 hian Phillip Island Circuit-ah Australian Grand Prix an tlan dawn, an dinhmun hi inthlak danglam nghal vek thei a ni.

Kum 23 mi Quartararo chuan, "Khaw awm dan thlir chuan tlan kawng hi a huh mai thei, chuvangin tun dinhmunah chuan bike ke (tyre) hman tur ka sawi lawk thei lo. Khuain min bumro a nih chuan eng pawh thleng thei a ni ang.

"Season kal laiah a tlan chak leh ṭha ber ka ni lo tih ka hria, hma ka hruai theih chhan erawh intlansiak tam zawka point ka hmuh ṭhin vang a ni. Australia ram hi Ducati leh Honda tan hmun ṭha a ni ṭhin, kuminah erawh Yamaha hun a nih ka beisei," tiin a sawi.