Aizawl FC leh Venghnuai danglamna penalty

Zote Honda MPL9-ah Aizawl FC-in hmahruaina belhchhah nan anmahni hnaihtu FC Venghnuai chu 2-1 in an lehthal a, I League club goal hnih hi penalty aṭanga khung a ni.

RG Stadium-a inkhelah hian I League club-in ball chang tam mah se FC Venghnuaiin Malsawmzela (Valpuia) hmangin minute 21-naah an khung. Goal an khung theih nan Tea Chinzah bawk a che ṭha a, vei lama aṭanga a ball pek luh chu Valpuia'n AFC captain Lalchhawnkima a paltlang hnuah chiang takin a pet goal.

Rindika Hmar hoten an hna an hre chiang a, chak thei dinhmunah an ding. Venghnuaiin ṭantu an nei ṭha a, Aizawl FC-in ball chang tam mah se an ding khawng ṭha hle.

Aizawl FC-in ball an chang tam zel a, inkhel am thunun rah an seng. Minute 62-naah Lalruatfela'n foul a nei a, referee-in penalty a pe. Replay aṭanga thlirin box pawn chiah nia a lan avangin I League club an vannei, Chhawnkima a lpen chhuak a, siphurh sutna goal a khung.

Aizawl FC an vannei chhunzawm a, minute 90-naah Venghnuai defender Lalrempuia'n a kut a pet per a, penalty a chawi. I League club tan Chhawnkima'n chakna goal a khung Referee thutluknaah Venghnuai ṭantute an lungawi lo a, an vanduai miau avangin rilru na takin kartawp an hman a ṭul ta thung.

Aizawl FC 2 -1 FC Venghnuai
AFC : Lalchhawnkima 62', 90'
FCV : Malsawmzela (Valpuia) 21'
MoM : K. Lalrinfela, Aizawl FC