Tute phûrna nge sang zawk Police nge Ramhlun North?

Mizoram Police-in coach thar Lalbiaksanga Colney hnuaiah match li chhungin point 10 an hlawh chhuak. Vawiin tlai dar 3:00 hian Mizoram Premier League round 10 ṭanna'n match hnih chak zawn tawh Ramhlun North an hmachhawn ang. Team pahnih phûr vanglai tak a nih avangin Lammual inkhel a hmuhnawm khawp ang.

Ṭawngkamin bul ṭan
Mizoram Police hian Ram­hlun North aṭangin TATA Foot­ball Academy chhuak Toky Zomuanpuia an lalut a, hei hi chu club pahnih inremsiamna a ni. Ramhlun North hian Liberian defender Korhena A. Boekai an lakluh vangin Toky-a chhuah an phalsak a, Police-in tlarhnung thawm ṭhat nan lawm takin an lalut.

Amaherawhchu Police hian player an zawng chhunzawm a, Ramhlun North coach Samson Ramengmawia chuan, "BS-a hi player-te fuih thiam tak a ni a, ka zah khawp mai. Chutih rual chuan club-a contract nei lai Police hna nghet pe thei nghal tur anga an insawi hi chu bansan se ṭha ka ti," tiin khelmual pawna Police chet danah a lawm loh thu a sawi.

Season liam ta khan Samson-a hi BVT-ah BS-a hnuaiah a khel a, coach pahnih hi inhre ṭha tak a ni.

Boruak a sang
Mizoram Police hian BS-a hnuaiah Ramhlun North hi 4-3 in an hneh tawh a, inkhel hmuhnawm tak a ni. Tun ṭumah hian team pahnih hian point 11 ve ve an hmu a, an phur vang­lai taka intawng an nih bakah semifinal khel tur zawnna a nih bawk avangin inkhel hi a hmuhnawm lehzual ang.

Police laka hattrick siamtu Lal­remruata'n Lungleiah Bethlehem Vengthlang lakah chakna goal a khung a, MPL6-ah goal sarih khung tawhin top scorer a ni mek. Remruata thlawptu Lalliansanga a dam leh tawh a, tlarhnung tihphui nan Liberian defender Korhena an nei tawh a, man of the match vawi thum ni thei Lalrinfela'n a vanglai a hman ṭhat leh mek avangin Ramhlun North ṭhat vanglai tak a ni.

Police coach BS-a chuan, "Ramhlun North hi game fight thei tak an ni a, mah se an ṭhat­na lai leh an chhiatna lai ka hria a, chumi lai chu kan hmang ṭangkai ang," tiin a hlauh loh thu Vanglaini a hrilh.

Mizoram Police hian BS-a Colney hnuaiah hneh loh an la tawng lo a, Ramhlun North hneh nawn tumin Lammual an pan ang. MPL-ah hian goal difference aia head to head a pawimawh avang­in vawiin inkhel hi point thum inchuhna aiin a sang zawk a ni.