Mourinho a lawm lo

Manchester United manager Jose Mourinho chuan rilru pek tawk loh vanga tlawm chu result chhe tak a nih thu a sawi. Inrinni Premier League inkhelah United hi an mikhual Huddersfield lakah 2-1 in an tlawm.

United manager Mourinho chuan, "Rilru pek tawk loh vanga chak loh chu a pawi hle," a ti. United hi tun season Premier League match kua an khelhah an chak loh vawi khatna a ni a, hmahruaitu Manchester City aiin point ngain an hniam ta zawk.

Goal ven thiam Mourinho nauten an league match hmasa pariatah clean sheet vawi sarih an nei thei. Mahse, kaithar Huddersfield khelmualah Juan Mata leh Victor Lindelof te tihsual vangin Aaron Mooy leh Laurent Depoitre ten goal an khung a, an goal chhuah pahnih inkarah minute nga bak hun a awm lo.

Mourinho chuan, "Mata leh Victor te dem ngawt theih an ni lo a, player dangte pawh kha an rilru put hmang a dik tawk lo a ni," a ti. United hian Champions League-ah Benfica an hneh a, Mourinho hian European football an khelh chu chhuanlam theih a nih loh thu a sawi bawk.

Manchester United hian hliam vangin Paul Pogba an la chhawr thei lo a, minute 23-na lekah defender Phil Jones thlak a ngai bawk. Pound maktaduai 31 man Swedish defender Victor Lindelof-a'n Jones hmunruak a luah zo lo a, tlarhnung laia awm Chris Smalling chu inhliam Eric Bailly anga rintlak a ni pha lo bawk.

Team pahnih squad thlir chuan United hian European football khel chau mah se hnehna chang tura rinkai zawk an ni a, inkhel dangah an elpui Man City an chak bawi si avangin Mourinho tan a lawmawm loh dan a thuahhnih ang.

Kum 54 mi Mourinho chuan, "United manager ni loin fans ni zawk ta ila chuan kan chak loh vang hian ka thinrim ngawt ang. Keini aia ṭha zawk lakah kan chak lo a nih chuan a tuar thiam theih a, kan rilru put hmang dik tawk loh vang ringawt chak loh chu a na a ni," tiin a naute chu chak duh a tuihal tawk lohah a ngai.