Team huaisen Blues an chak

Chelsea chuan Premier League champion an nih zia an lantir. Antonio Conte nauten an mikhual Watford lakah si an phurh zet hnuah 4-2 in an lehthal a, a zawna match thum chhung chak ni hmel an hmuh loh chu a tawp ta.

Super sub

Arsenal hneh hlim Watford chu Inrinni zan khan inrintawkna sang tak nen Stamford Bridge-ah an leng lut a, an khingpui hi Chelsea kher chu ni lo se point an hmuh ngei a rinawm. Blues tan Barcelona forward hlui Pedro-a'n yard 25-a hla aṭanga goal mawi khungin an mualah hma an hruai.

Season bul ṭan ṭha tak Watford tan midfielder Abdoulaye Doucoure-a'n chawlhlawk hma chiahin an si phurh sut nan a hlap lut a, second half ṭan tirah midfielder Roberto Pereyra chuan a hun ṭha neih ho lam takin hlah mah se a vawi hnihnaah erawh a chesual nawn lo.

An mualah Chelsea-in tlawm an duh lo, Conte-a'n striker damkawr Alvaro Morata la chhuakin Michy Batshuayi a luhtir a, substitute dang Davide Zappacosta nen result an thlak danglam. Belgium international Batshuayi hian a pu beiseina a tithlawn lo, bench aṭanga lut ve tho Willian-a cross ball ṭha zet chu an si phurh sut nan a tauh goal a, hun tawp hma minute thum chiah a awm tawh tihah Cesar Azpilicueta chuan an hmahruaina goal a khung bakah Batshuayi bawkin an goal lina a khung bawk.

Conte a lawm

Italian manager Antonio Conte-a'n season hmasa Premier League champion a nih theih nana player pawimawh chu N'Golo Kante a ni. France international midfielder hi hliam vangin a chawl mek, tunah rih chuan hmunruak luah zo an nei lo niin a lang. Kante awm loh hlanin Blues an buai - an midfield a thawl a, an tlarhnungin an tuar zui bawk.

Table hmahruaitu Manchester City an hneh lo chu a mak hran lo a, a mawngphaha awm Crystal Palce an ngam loh avangin Conte tan a luhai thlak hle ang. Watford an hneh hnuah Conte chuan, "A harsa hle a ni. Hun khirhkhan tak kan tawng a, ka nauten hnehna chan duh tih hriat tak maiin huaisen taka an bei let khan min tilawm hle a ni," tiin a sawi.

Inkhel Results
England - Premier League
Chelsea 4 - 2 Watford
Huddersfield 2 - 1 Man United
Manchester City 3 - 0 Burnley
Newcastle United 1 - 0 Crystal Palace
Stoke City 1 - 2 Bournemouth
Swansea City 1 - 2 Leicester City
Southampton 1 - 0 West Brom