Chhinga Veng tan zan duhawm?
Zanin hian Chhinga Vengin Mizoram Premier League inkhelah Dinthar FC lakah an tlawm lo a nih chuan hneh loh tawng lo a match 22 chhung an kal tluang dawn - Chanmari FC record an khumna tur chiah a ni.
An hmaah Dinthar
Chhinga Veng leh Dinthar FC inkarah point 15 zet awm mah se MPL nomawi chawi hmasa ber Maimawms hi awlsam taka kal pelh theih an ni lo ang.
An intawn hmasak ṭumin Chhingcows hi 3-1 in chak a, scoreline aṭanga teh chi a ni lo. Chhinga Veng hian goal hnuhnung pahnih hi minute 90 hnu lama an khung ve ve a ni.
Hei chauh hi a ni lo, Dinthar FC-in coach thar Vanlalrova an nei a, tunah hian tlak hlauhawm aṭanga talchhuah an tum satliah lo a, semifinal khelh phak an la tum.
Dinthar FC hian a zawna vawi 21 hneh loh nei loa veteran coach H. Vanlalthlanga hnuaia Chanmari FC kal tluang chu an lo tihtawp sak tawh a, Chhinga Veng kal tluang tihtawp leh hi an châk zawng tak a ni ngei ang.
Record a hlu
Chhinga Veng coach Lalsangzuala Hmar chuan, "Kan result hi chu Pathian thu thu a ni a, kei ni lam duh danah chuan vawi 22 aia tam thlen pawh a châkawm," tiin Vanglaini a hrilh.
Chhingcows hian tun season-ah MFA Super Cup leh I Day Football-ah champion tawh mah se MPL champion ngei an tum a, foreigner pawh pahnih la belh tawhin defender Lassi Adeyemi leh midfielder Olumide Olawale te chu Chanmari West an hneh ṭumin an chhawr tawh.
Chhinga Veng boss Sanga chuan Dinthar nena an inkhel tur hi a pawimawh avangin West Warrior nena hahdamtir goal ruk khung tawh striker Malsawmfela'n inkhel bul a ṭan tur thu a sawi bawk.